وزیر ریلوے اعظم خان سواتی نے کہا ہے کہ ہم نے ایک سال کے اندر ریلوے کو ایک منافع بخش ادارہ میں تبدیل کرنے کا ہدف مقرر کیا ہے۔

اعظم سواتی نے ریلوے ورکشاپ مغلپورہ کا دورہ کیا، اس دوران انہوں نے  میڈیا سے گفتگو کے دوران کہا کہ ریلوے میں میرا سب سے بڑا افسر مزدور ہے، ریل مزدوروں کو پی ٹی آئی کے جھنڈے نہیں دوں گا، اگر مزدور کی زندگی افسر کی زندگی سے بہتر ہوگئی تو ہم قوم کے سامنے سرخرو ہوں گے۔

انھوں نے کہا ہے کہ ملک خسارے میں ہے وکٹوریہ کا نظام نہیں چل سکتا، جس دن پی ٹی آئی نے سیاست کی اس دن ریلوے کا نظام ڈوب جائے گے، ہماری سیاست ہوگی نقصان کو منافع بخش بنائیں۔

اعظم سواتی نے کہا کہ میں جس وزارت میں رہا ہوں میں نے وہاں ڈلیور کیا ہے، مجھے صرف ریل کو ڈائریکشن دینی ہے،کام ٹیم نے کرنا ہے۔

وزیر ریلوے نے کہاکہ کسی کو پسند ہو نہ ہو ریلوے کی ترقی اولین ترجیح ہے۔

اُنھوں نے کہاکہ پنشن اس ملک کے لیے دیمک ہے، انسانی سیفٹی میرے نزدیک سب سے اہم ہے۔

اعظم سواتی نے سابق وزیر ریلوے شیخ رشید احمد سے متعلق کہا کہ شیخ رشید میرے لیے کافی اچھا کام کرکے گئے ہیں، بنیادیں بن چکی ہیں عمارت کھڑی کرنا میرا کام ہے۔