مریم اورنگزیب کا کہنا ہے کہ شہباز شریف کے خلاف سو پیسے کی کرپشن ثابت نہیں ہوسکی

تفصیلات کے مطابق مسلم لیگ ن کی ترجمان مریم اورنگزیب نے پاکستان مسلم لیگ (ن) کےصدر شہباز شریف کے جیل میں سو دن مکمل ہونے پر کہا ہے کہ شہباز شریف کو جیل میں 100 دن ہو گئے،لیکن 100 پیسے کی کرپشن ثابت نہ ہو سکی۔

انھوں نے کہا کہ عمران خان نے پی ڈی ایم سے این آر او لینے کیلئے شہباز شریف اور خواجہ آصف کو گرفتار کیا ہے۔ عمران خان نے شہباز شریف کو صرف اس لیے گرفتار کیا ہوا ہے کیونکہ وہ خود نالائق، نااہل، چور اور جھوٹے ہیں، اُنہیں معلوم ہے کہ شہباز شریف کی ملک چلانے اور عوام کو ریلیف دینے کی پوری تیاری ہے۔

مسلم لیگ ن کی ترجمان نے کہا کہ جو کاغذ شہباز شریف کے خلاف جھوٹے الزامات لگانے اور میڈیا ٹرائل کیلئے لہرائے جاتے تھے، وہ عدالتوں میں پیش نہیں ہوتے۔

انہوں نے مزید کہا کہ شہباز شریف اِس لیے گرفتار ہیں تاکہ عمران صاحب مہنگائی تین سے چودہ فیصد کرنے، ایک کروڑ نوکریاں اور پچاس لاکھ گھر نہ دینے پر اپنے لیے این آر او لے سکیں اور کوئی ان سے  یہ نہ پوچھے کہ سو دن کے پلان کا کیا ہوا۔