سندھ بھر میں میٹرک اور انٹرمیڈیٹ کے امتحانات کیلئے وزیر تعلیم نے شیڈول بتا دیا ہے۔

تفصیلات کے مطابق وزیر تعلیم سندھ سعید غنی نے کہا کہ نیا تعلیمی سال دو اگست سے شروع ہوگا اور رواں برس موسم گرما کی تعطیلات صرف جولائی میں ہوں گی۔

انہوں نے بتایا کہ میٹرک امتحانات یکم سے15 جولائی اور انٹرمیڈیٹ امتحانات28جولائی سے16 اگست تک ہوں گے۔

امتحانات کا دورانیہ  3 کے بجائے 2 گھنٹے ہوگا۔

تمام بورڈز امتحانات کے نتائج 90روز میں تیارکرینگے۔

دونوں جماعتوں میں پریکٹیکلز( عملی امتحانات) جون میں ہوں گے۔

سندھ بھر میں تمام تعلیمی ادارے یکم فروری سے کھل جائیں گے۔

وفاقی وزارت تعلیم نے وفاقی سرکاری تعلیمی اداروں کے لیے تعلیمی سیشن 2020-21کا جو کیلنڈر جاری کیا اس کے مطابق پانچویں اور آٹھویں کے مرکزی امتحانات 18 سے 31 مئی تک ہوں گے۔

پہلی سے چوتھی اور چھٹی اور ساتویں کے امتحانات ادارے یکم سے 15 جون تک لیں گے۔

وزارت تعلیم کی جانب سے جاری کردہ کیلنڈر کے مطابق پانچویں اور آٹھویں کے مرکزی امتحانات کے نتائج کا اعلان 30جون کو ہوگا۔

پہلی سے چوتھی اور ساتویں آٹھویں کے امتحانات کے نتائج کا اعلان یکم جولائی کو کیا جائے گا۔

واضح رہےکہ وفاقی نظامت تعلیمات نے بھی نوٹیفکیشن جاری کردیا جس کے مطابق تعلیمی اداروں میں پرائمری اور مڈل تک کلاسز کا آغاز یکم فروری سے ہوگا، نویں سے بارہویں تک کلاسز کا آغاز پہلے ہی ہوچکا ہے۔

یاد رہےکہ وفاقی وزیر تعلیم شفقت محمود نے ملک بھرمیں تعلیمی ادارے18 جنوری سے مرحلہ وار کھولنے کا فیصلہ کیا تھا۔

وزیرتعلیم کا کہناتھا کہ9،10،11 اور12 کلاسز کا تعلیمی سلسلہ 18 جنوری کو شروع ہوجائے گا۔

ان کا کہنا تھا کہ جن کلاسز کا آغاز25 جنوری کو ہونا تھا اب وہ یکم فروری سے شروع ہوں گی، ہائر ایجوکیشن کے تعلیمی ادارے بھی یکم فروری سے کھلیں گے۔

 کورونا وائرس کے باعث گزشتہ سال 15 مارچ سے تمام تعلیمی ادارے بند کر دیے گئے تھے جبکہ سندھ میں 26 فروری کو پہلا کیس سامنے آنے کے بعد سے ہی تعلیمی ادارے بند تھے۔

مزید پڑھیں

تعلیمی سیشن کا کیلنڈر جاری، گرمیوں کی چھٹیوں سے متعلق اہم فیصلہ

وفاقی وزارت تعلیم نے وفاقی سرکاری تعلیمی اداروں کے لیے تعلیمی سیشن...

 چھ ماہ کی طویل بندش کے بعد تعلیمی اداروں کو 15 ستمبر2020 کو دوبارہ کھولا گیا تاہم وبا کی دوسری لہر کے باعث انہیں 26 نومبر کو دوبارہ بند کر دیا گیا تھا۔