نیب اجلاس میں فرانزک سائنس لیبارٹری کو مزید فعال بنانے کا فیصلہ کرلیا گیا۔

تفصیلات کے مطابق چیئرمین نیب جسٹس ر یٹائرڈ جاوید اقبال کی زیر صدارت نیب کا اعلیٰ سطحی اجلاس ہوا۔

اجلاس میں ڈپٹی چیئرمین نیب حسین اصغر، پراسیکیوٹر جنرل اکاؤنٹیبلٹی ،ڈی جی آپریشنزنیب ، نیب کے تمام علاقائی بیوروز کے ڈائریکٹرز جنرلز  نے بذریعہ ویڈیو لنک شرکت کی۔

اجلاس میں نیب کی مجموعی کاردکردگی کا جائزہ لیا گیا اور ملک بھر کی مختلف فاضل احتساب عدالتوں میں نیب کے زیر سماعت ریفرنسز کا بھی جائزہ لیا گیا۔

اجلاس میں فیصلہ کیا گیا کہ نیب کے مقدمات کی ٹھوس شواہد، مستند دستاویزات اور گواہوں کے بیانات کی روشنی میں پوری تیاری کے ساتھ قانون کے مطابق پیروی کریں گے۔

اجلاس میں شکایات کی تصدیق، انکوائریوں، اور انوسٹی گیشنز کے معیار کو مزید بہتر بنانے کا بھی جائزہ لیا گیا ۔

چیئرمین نیب نے ہدایت کی  کہ مقدمات کو منطقی انجام تک پہنچانے کے لیے تمام وسائل بروئے کار لائے جائیں  تاکہ بدعنوان عناصر کو قانون کے مطابق انصاف کے کٹہرے میں کھڑا کیا جا سکے جہاں قانون اپنا راستہ خود بنائے گا۔

چیئر مین  نیب  نے کہا کہ نیب کے اس وقت 1230بدعنوانی کے ریفرنسز ملک کی معزز احتساب عدالتوں میں زیر سماعت ہیں۔   نیب ملک سے بد عنوانی کے خاتمہ کے  لیے انتہائی سنجیدہ کوششیں کر رہا ہے۔

جسٹس ریٹائرڈ جاوید اقبال نے کہا کہ  نیب ایک انسان دوست ادارہ ہے۔  نیب کا ایمان کرپشن فری پاکستان ہے۔   نیب میں آنے والے ہر شخص کی عز ت و احترام کو یقینی بنایا جائے۔