قومی احتساب بیورو (نیب) کے چیئرمین جسٹس (ر) جاوید اقبال نے کہا ہے کہ ملک سے بدعنوانی کا خاتمہ، بدعنوان عناصر سے لوٹی گئی رقوم کی واپسی اور قومی خزانہ میں جمع کرانا اولین ترجیح ہے۔

تفصیلات کے مطابق قومی احتساب بیورو کے چیئرمین جسٹس جاوید اقبال کی زیر صدارت نیب کا اعلیٰ سطحی اجلاس ہوا جس میں میں نیب کی مجموعی صورتحال، خصوصاً میگاکرپشن کے مقدمات کو منطقی انجام تک پہنچانے پر تبادلہ خیال کی کیا۔

اجلاس کی صدارت کرتے ہوئے نیب کے چیئرمین نے کہا کہ نیب کے بدعنوانی کے 1230 ریفرنسز ملک کی مختلف معزز احتساب عدالتوں میں زیر التوا ہیں، نیب ریفرنسز کی تقریباً مالیت 947 ارب روپے ہے۔

جسٹس (ر) جاوید اقبال نے یہ بھی کہا کہ اربوں روپے کے میگا کرپشن مقدمات کی جلد سماعت کیلئے درخواستیں معزز احتساب عدالتوں میں دائر کی جائیں گی جبکہ متعلقہ مقدمات کو نیب آرڈیننس کی شق16(a)کے تحت قانون کے مطابق منطقی انجام تک پہنچایا جائے گا۔

نیب کے چیئرمین جسٹس (ر) جاوید اقبال نے مزید کہا کہ نیب کو ہدف تنقید بنانے کی بجائے اپنی تمام تر توانائیاں معزز احتساب عدالتوں میں اپنے خلاف دائر نیب کے ٹھوس شواہد کی بنیاد پر دائر بدعنوانی کے ریفرنسز کے دفاع پر خرچ کریں۔

اجلاس میں ڈپٹی چیئرمین نیب حسین اصغر، پراسیکیوٹر جنرل نیب سیّد اصغر حیدر اور ڈی جی آپریشن ظاہر شاہ نے شرکت کی۔