وزیر اعظم عمران خان کا کہنا ہے کہ کوئی بھی قانون سے بالاتر نہیں ہے۔

 تفصیلات کے مطابق  وزیر اعظم  عمران خان کی زیر صدارت نیشنل کوآرڈینیشن کمیٹی (این سی سی )برائے سیاحت سے متعلق اجلاس ہوا۔

اجلاس میں وزیر اعلیٰ کے پی کے ، زلفی بخاری سمیت دیگر   سینئر عہدیداران شریک ہوئے۔

وزیر اعظم کو پنجاب، کے پی  کےاور بلوچستان میں سیاحوں کے نئے مقامات  کے بارے  میں بریفنگ دی گئی۔ بریفنگ میں بتایا گیا کہ سائٹیں سالٹ رینج، پوٹھوہار، ضلع سوات، مری اور گوادر کے قریب ہیں۔

وزیراعظم  نے نجی سیاحت سے متعلق اظہار خیال کرتے ہوئے کہا کہ   سیاحت سے زیادہ سے زیادہ فوائد حاصل کرنے کے  لیے منصوبہ بندی ضروری ہے۔ سیاحتی مقامات کی ترقی سے پہلے سائنسی بنیادوں پر منصوبہ بندی اور فزیبلٹی ضروری ہے۔

وزیر اعظم نے سیاحت کے مقامات کے  لیے مقامی ورثہ اور ماحولیاتی تحفظ کی اہمیت پر زور دیا۔

اجلاس میں ملک بھر میں  جاری انسداد تجاوزات مہم  پر بھی وزیر اعظم کو بریفنگ دی گئی۔

وزیر اعظم نے انسداد تجاوزات مہم بغیر کسی امتیازی سلوک  کے جاری رکھنے کی ہدایت  کرتے ہوئے کہا کہ  کوئی بھی قانون سے بالاتر نہیں ہے۔

عمران خان نے کہا کہ  سیاحت کے مقامات پر ترقیاتی کاموں سے قبل قوانین اور ضوابط کا خیال رکھا جائے۔صفائی ستھرائی اور ماحولیاتی تحفظ کو یقینی بنایا جائے۔