الیکشن کمیشن کی جانب سے جاری احکامات کے بعد اپوزیشن لیڈر سندھ اسمبلی حلیم عادل شیخ کو گرفتار کرلیا گیا ہے۔

الیکشن کمیشن کے مطابق حلیم عادل شیخ ضابطہ اخلاق کی خلاف ورزی کے مرتکب ہوئے ہیں کیونکہ الیکشن کمیشن کے قوانین کے تحت کوئی رکن اسمبلی، وزیر اور دیگر آفس ہولڈر پولنگ اسٹیشنز کا دورہ نہیں کر سکتے ہیں۔

بعدازاں الیکشن کمیشن نے قانون نافذ کرنے والے اداروں کو خط جاری کرتے ہوئے حلیم عادل شیخ کو حلقے سے باہر نکالنے کا حکم جاری کیا ہے۔

جاری کردہ احکامات میں واضح کیا گیا ہے کہ حلیم عادل شیخ امن و امان کی صورتحال خراب کر رہے ہیں تاہم ان کو پی۔ایس 88 سے فوری باہر نکالاجائے۔

الیکشن کمیشن کے احکامات کے بعد پولیس نے حلیم عادل شیخ کو حراست میں لے لیا ہے۔

یاد رہے کہ اس سے قبل پی ٹی آئی کے رہنما حلیم عادل شیخ کی گاڑی پر فائرنگ کا واقعہ حلقہ پی ایس 88 کے دیہی علاقے درسانو چھنو میں پولنگ اسٹیشن کا دورہ کرتے وقت پیش آیا ہے۔

اس حوالے سے حلیم عادل شیخ کا کہنا تھا کہ پہلے ہی کہہ چکا تھا کہ میری جان خطرے میں ہے اور آج فائرنگ پولیس کی موجودگی میں کی گئی ہے۔