وفاقی وزیر امور کشمیر و گلگت بلتستان علی امین گنڈاپور نے کہا ہے کہ وزیراعظم عمران خان کے وژن کے مطابق گلگت بلتستان میں سیاحت کے فروغ کے لیے اقدامات کر رہے ہیں۔

تفصیلات کے مطابق وفاقی وزیر امور کشمیر و گلگت بلتستان علی امین خان گنڈاپور نے نیشنل بینک کی تقریب میں اظہار خیال کرتے ہوئے کہا ہے کہ سیاحت سے بین الاقوامی سطح پر پاکستان کا امیج مزید بہتر ہو گا، سیاحت کی ترقی سے پاکستان کی معیشت مستحکم ہو گی۔

انہوں نے کہا ہے کہ ماضی کی حکومتوں نے سیاحت کی ترقی کے لیے کوئی توجہ نہیں دی لیکن موجودہ حکومت کا ابتدائی پروجیکٹ 150 گھروں سے شروع کیا جا رہا ہے۔

انہوں نے بتایا کہ اس پروگرام کو بڑے پیمانے پر پھیلایا جائے گا، سیاحت کے فروغ کے لیے حکومت بابو سر ٹاپ ٹنل بنانے کی منصوبہ بندی کر رہی ہے۔

وفاقی وزیر کا کہنا تھا کہ گلگت بلتستان کے تمام اسپتالوں میں تمام ضروری سہولیات فراہم کی جا رہی ہیں۔

معاہدے کے تحت نیشنل بینک ” این بی پی میزبان” پروگرام کے تحت گلگت بلتستان میں چھوٹے قرضے فراہم کرے گا، قرضے گھروں میں سیاحوں کی رہائش کے لیے کمرے تعمیر کرنے کے لیے استعمال کیے جائیں گے،پروگرام کے تحت گلگت بلتستان کی تمام وادیوں میں عوام کو قرض فراہم کیے جائیں گے۔