لاہور ہائیکورٹ کی جانب سے وفاقی وزیر اطلاعات و نشریات شبلی فراز کو عہدے سے ہٹانے کیلئے درخواست ناقابل سماعت قرار دے دی گئی ہے۔

تفصیلات کے مطابق جسٹس شاہد کریم نے مقامی وکیل محمد سرفراز عباس خان کی درخواست پر سماعت کی جس میں شبلی فراز اور سیکرٹری کیبنٹ ڈویژن کو فریق بنایا گیا تھا۔

درخواست میں موقف اختیار کیا گیا تھا کہ شبلی فراز پہلی بار 2015ء میں سینیٹر بنے اور انکے عہدے کی معیاد 2 مارچ کو ختم ہو گئی تھی جبکہ 21 اپریل 2020ء کو سینیٹر شبلی فراز کو وزارت اطلاعات و نشریات کا قلمدان سونپا گیا تھا۔

3مارچ کو شبلی فراز دوسری بار سینیٹر منتخب ہوئے اور  دوسری بار سینیٹر منتخب ہونے کے بعد شبلی فراز وفاقی وزیر کا دوبارہ حلف لینے کے پابند تھے۔

درخواست میں استدعا کی گئی تھی کہ شبلی فراز 2 ہفتوں سے غیر قانونی طور پر وزیر اطلاعات و نشریات کے عہدے پر براجمان ہیں اس لئے سینیٹر شبلی فراز کو عہدے سے ہٹایا جائے۔