وزیراعظم عمران خان نے کہا ہے کہ  غریب عوام کو ریلیف پہنچانا  ہماری ذمہ داری ہے،ہمیں اپنی ذمہ داری کا  مکمل احساس ہے اور ہم اس کو پورا کرنے کے لئے ہر حد تک جائیں گے۔

تفصیلات کے مطابق وزیراعظم عمران خان  کی زیر صدارت اجلاس ہوا جس میں مستحق  اور غریب افراد کے لئے غذا اور دیگر اشیائے ضروریہ کی خریداری میں براہ راست سبسڈی کی فراہمی کا جائزہ لیا گیا ہے۔

اجلاس میں وزیراعظم نے کہا ہے کہ حکومت کو ملکی معاشی حالات کے باعث غریب افراد پر پڑنے والے بوجھ کا مکمل احساس ہے اور ہماری  ہر ممکنہ کوشش ہے کہ غریب عوام پر مہنگائی کا بوجھ کم کیا جائے۔

وزیراعظم نے کہا ہے کہ حکومتی سبسڈی کا شفاف اور مؤثر استعمال موجودہ حکومت کی اولین ترجیح ہے۔

اجلاس میں ڈاکٹر ثانیہ نشتر نے وزیراعظم کو مجوزہ احساس فوڈ اسٹیمپ پروگرام، خدو خال اور طریقہ کار کے حوالے سے بریفنگ دیتے ہوئے بتایا کہ پروگرام کے تحت مستحق افراد کو اشیائے ضروریہ کی خریداری میں براہ راست سبسڈی فراہم کی جائے گی۔

اجلاس میں وزیراعظم کو بریفنگ میں بتایا گیا ہے کہ اس  پروگرام کا مقصد بالواسطہ سبسڈی کے نظام سے براہ راست مالی معاونت کا طریقہ کار اپنانا ہے اور اس پروگرام سے مستحقین تک حکومتی امداد  براہ راست، شفاف طریقے  اور فوری طور پر میسر آئے گی۔

وزیراعظم عمران خان نے کہا ہے کہ مجوزہ نظام کے حوالے سے طریقہ کار اوراعداد وشمار کو جلد از جلد حتمی شکل دی جائے تاکہ اس پروگرام کا جلد از جلد اجراء کیا جائے۔

اجلاس میں وزیرِ اعظم کو پروگرام سے استفادہ پانے والے خاندانوں اور افراد کے اعدادو شمار اور  ابتدائی تخمینے پیش کیے گئے ہیں جس پر وزیرِ اعظم نے مجوزہ پروگرام کو سراہا ہے۔

اجلاس میں عبدالحفیظ شیخ،  محمد حماد اظہر، ڈاکٹر عشرت حسین، ڈاکٹر وقار مسعود، ڈاکٹر ثانیہ نشتر،  گورنر سٹیٹ بنک ڈاکٹر رضا باقر، متعلقہ وزارتوں کے سیکرٹریز و دیگر سینئر افسران شریک ہوئے۔