وزیر خزانہ حماد اظہر کی زیر صدارت کابینہ کی اقتصادی رابطہ کمیٹی کا اجلاس آج ہوگا جس میں 21 نکاتی ایجنڈے پر غور کیا جائے گا۔

اجلاس کے دوران بھارت سے روئی اور چینی کی درآمد کی اجازت کی سمری پیش کی جائے گی اور اسٹریٹجک ٹریڈ پالیسی فریم ورک 2020 سے 2025 پر غور کیا جائے گا۔

دوران اجلاس وزیراعظم کے کم لاگت گھروں کی اسکیم کیلئے 2 ارب کی گرانٹ کی منظوری متوقع کی جارہی ہے۔

اجلاس میں پنک راک سالٹ کی جغرافیائی حقوق کی رجسٹریشن کیلئے سمری بھی پیش کی جائیگی۔

اقتصادی رابطہ کمیٹی کے اجلاس میں پی آئی اے کی تنظیم نو کی سمری پیش کی جائے گی جبکہ وزارت پیٹرولیم کی ٹیکنیکل گرانٹ کی سمری کی منظوری متوقع ہے۔

ذرائع کے مطابق ایجنڈے میں کمیونٹی اسکولز، طلباء کیلئے اسکالرشپ سمیت وزارت تعلیم کی گرانٹس کی سمریاں شامل ہیں جبکہ پاکستان اسٹیل ملز کیلئے 2 ارب 52 کروڑ روپے سے زائد کی حکومتی گارنٹی کی منظوری کا بھی امکان ہے۔