وزیراعظم عمران خان کی زیر صدارت وفاقی کابینہ کا اجلاس آج دوپہر 1 بجے ہوگا جس میں وزیراعظم بذریعہ ویڈیو لنک شرکت کرینگے۔

وفاقی کابینہ کے اجلاس میں 23 نکاتی ایجنڈے پر غور کیا جائے گا جس میں وزیر خزانہ سمیت کابینہ میں ممکنہ ردوبدل پر بھی بات ہوگی۔

اجلاس میں وفاقی کابینہ ملک کی معاشی اور سیکیورٹی صورتحال سمیت کورونا کی صورتحال، ویکسین کی دستیابی اور علاج کی سہولتوں کا جائزہ لے گی۔

کابینہ کورونا ویکسین کی نجی مارکیٹ میں فروخت کے لئے قیمت کا تعین کرے گی اور ادویات کی زیادہ سے زیادہ قیمتوں کی حد کی منظوری بھی دے گی۔

کابینہ کو بھارت کے ساتھ تجارتی روابط میں پیش رفت پر بریفنگ دی جائے گی۔

کابینہ اجلاس میں الیکٹرانک ووٹنگ مشین اور سمندر پار پاکستانیوں کو ووٹ کی سہولت پر بریفنگ دی جائے گی۔

پبلک سیکٹر اداروں کے سی ای اوز کی خالی پوسٹوں کی رپورٹ پیش کی جائے گی اور تمام ایس ای اوز کے آڈٹ کی پیش رفت کے متعلق بریفنگ دی جائے گی۔

کابینہ اجلاس میں اسٹیل ملز کے لئے سبسڈی کے معاملے سمیت رولز آف بزنس 1973 میں ترمیم کا معاملہ کابینہ ایجنڈے میں شامل کر لیا گیا ہے۔