پیپلز پارٹی کے سیکریٹری اطلاعات مولا بخش چانڈیو نے کہا ہے کہ مسئلہ وزیروں میں نہیں عمران خان میں ہے۔

تفصیلات کے مطابق پیپلز پارٹی کے سیکریٹری اطلاعات مولا بخش چانڈیو نے اپنے ایک بیان میں کہا کہ سلیکٹڈ وزیراعظم نے ایک بار پھر اپنی ناکامیوں کا الزام عوام پر ڈال دیا ہے۔

مولا بخش چانڈیو نے کہا کہ حکومت کی ناقص پالیسیوں کی وجہ سے ملک کے حالات دن بدن ابتر ہوتے جا رہے ہیں۔

پیپلز پارٹی کے سیکریٹری اطلاعات کا کہنا تھا کہ عمران خان نے سیاسی حالات خراب کر کے ذمہ داری اپوزیشن پر ڈال دی اور اب کورونا کے پھیلاؤ کا ذمہ دار عوام کو ٹھہرا کر اپنی ناکامی کا اعتراف کر لیا ہے۔

مولا بخش چانڈیوکا یہ بھی کہنا تھا کہ پونے تین سالوں میں عمران خان نے وزیر بدلنے کے علاوہ کوئی کام نہیں کیا،کورونا کی پہلی لہر میں عمران خان نے لاک ڈاؤن ناکام بنانے کیلئے ہر حربہ استعمال کیا۔

پیپلز پارٹی کے سیکریٹری اطلاعات مولا بخش چانڈیو کا مزید کہنا تھا کہ مسئلہ وزیروں میں نہیں عمران خان میں ہے ، عمران خان گھر جائیں گے تو اس قوم کو مسائل اور بحرانوں سے نجات ملے گی۔