نیشنل کمانڈ اینڈ آپریشن سینٹر کی جانب سےعید کی تعطیلات کا اعلان کرتے ہوئے نوٹیفکیشن جاری کردیا گیا ہے۔

تفصیلات کے مطابق وفاقی وزیر اسد عمر کی زیر صدارت این سی او سی کا اجلاس منعقد ہوا ہے جس میں ملک میں کورونا کی موجودہ صورتحال کو دیکھتے ہوئے اہم فیصلے کیے گئے ہیں۔

این سی او سی کے فیصلے کے مطابق ‏عید الفطرپر تعطیلات 10 سے 15 مئی تک ہوں گی تاہم عید تعطیلات کے دوران شہریوں کو گھر پر رہتے ہوئے محفوظ رہنے پر زور دیا ہے۔

اجلاس میں واضح کیا گیا ہے کہ عید پر ملک بھر میں تمام سیاحتی مقامات بند رہیں گے اور لازمی سروسز کے علاوہ دکانیں اور مارکٹیں بند رہیں گی۔

این سی او سی کی جانب سے چاند رات پر بازاروں پر پابندی کا فیصلہ  کیا گیا ہے اسکے علاوہ مہندی، جیولری ,کپڑوں کے اسٹالز پرپابندی ہو گی۔

اسکے علاوہ وباء کے عالمی سطح پر پھیلاؤ کے پیش نظر 5 مئی سے 20 مئی تک ان باؤنڈ مسافر پروازیں محدود کرنے کا فیصلہ کیا گیا ہے۔

اجلاس میں آکسیجن کی پیداوار اور سپلائی کے حوالے سے انتظامات کا بھی جائزہ لیا گیا ہے جس میں 6 ہزار میٹرک ٹن آکسیجن اور 5 ہزار آکسیجن سلینڈرز امپورٹ کرنے کا فیصلہ کیا گیا ہے۔

این سی او سی کے مطابق یوم علی، شب قدر، اعتکاف اور جمعتہ الوداع کے لئے گائیڈ لائنزپر عمل درآمد یکم مئی سے ہوگا۔