تھرپارکر میں بچوں کی اموات پر قابو پانا مشکل ہو گیا ہے۔

تفصیلات کے مطابق ذرائع سے معلوم ہوا ہے کہ سول ہسپتال مٹھی میں غذائی قلت اور مختلف بیماریوں میں مبتلا مزید پانچ بچے دم توڑ گئے ہیں۔

ذرائع کا کہنا ہے کہ جاں بحق بچوں میں دولت بھیل، سومار کولھی، بھاگو بھیل، قیمت میگھواڑ اور محمد حسن کے نومولود بچے شامل ہیں۔

محکمہ صحت نے بتایا ہے کہ تھرپارکر میں روا‍‍ں ماہ میں جاں بحق بچوں کی تعداد 39 جبکہ رواں سال میں 379 ہوگئی ہے۔

ذرائع کا کہنا ہے کہ سول ہسپتال مٹھی میں ادویات اور لیبارٹریوں میں کیمیکل سمیت دیگر سہولیات کا فقدان ہے۔

ذرائع کا مزید کہنا تھا کہ تھر کے مختلف ہسپتالوں میں 70 سے زائد بچے ابھی زیر علاج ہیں۔