ترجمان دفترخارجہ زاہد حفیظ چوہدری نے کہا ہے کہ اسلامی سربراہی کانفرنس کے آزادانہ انسانی حقوق کمیشن کا وفد اسلام آباد اور آزاد جموں و کشمیر کا دورہ کرے گا۔

تفصیلات کے مطابق ترجمان دفترخارجہ زاہد حفیظ چوہدری نے اپنے جاری کردہ ایک بیان میں کہا ہے کہ اسلامی سربراہی کانفرنس کے آزادانہ انسانی حقوق کمشن کا 12 رکنی وفد 4 اگست سے 9 اگست تک پاکستان اور آزاد کشمیر کا دورہ کرے گا۔

زاہد حفیظ چوہدری کا کہنا ہے کہ رکنی وفد بھارت کے یکطرفہ و غیرقانونی اقدامات کے نتیجے میں بھارتی مقبوضہ کشمیر میں ابتر انسانی حقوق کی صورتحال کا جائزہ لے گا۔

انہوں نے کہا کہ اسلامی سربراہی کانفرنس کے آزادانہ انسانی حقوق کمیشن کو مقبوضہ کشمیر میں انسانی حقوق کی ابتر صورتحال کی نگرانی کا مینڈیٹ حاصل ہے، یہ مینڈیٹ 13ہویں اسلامی کانفرنس اور او آئی سی وزرائے خارجہ کونسل کے 42 ویں سیشن نے دیا تھا۔

دفتر خارجہ کا کہنا تھا کہ اس مینڈیٹ کے تحت رکنی وفد مقبوضہ کشمیر میں انسانی حقوق کی خلاف ورزیوں کی باقائدہ رپورٹس جمع کرائے گا۔

زاہد حفیظ چوہدری نے کہا کہ اسلامی سربراہی کانفرنس کے آزادانہ انسانی حقوق کمشن کے 17ہویں اجلاس میں مقبوضہ کشمیر میں حقائق جاننے کے مشن بھجوانے پر بھارتی حکومت نے جواب نہیں دیا تھا۔

انہوں نے کہا کہ کمیشن رکنی وفد نے آزاد جموں و کشمیر کے دورے اور بھارتی قابض افواج کی انسانی حقوق کی خلاف ورزیوں اور پابندیوں کے کشمیریوں پر اثرات کا جائزہ لینے کا فیصلہ کیا ہے۔

ترجمان دفترخارجہ زاہد حفیظ چوہدری کا مزید کہنا تھا کہ کمیشن رکنی وفد اپنے دورے میں مظفر آباد اور لائن آف کنٹرول جائے گا جبکہ اس دوران وفد کشمیری قیادت, کشمیری مہاجرین اور بھارتی مظالم کے متاثرین سے بھی ملاقاتیں کرے گا۔