پاکستان پیپلز پارٹی پارلیمنٹرینز کی مرکزی سیکریٹری اطلاعات شازیہ مری نے کہا ہے کہ عمران خان پارلیمان میں اپنی اہمیت کھو چکے ہیں۔

شازیہ مری نے پارلیمان کے مشترکہ اجلاس سے بھاگنے پر حکومت پر کڑی تنقید کرتے ہوئے کہا کہ پیشگی اپنی شکست دیکھ کر حکومت نے پارلیمان کا مشترکہ اجلاس مؤخر کر کے راہِ فرار اختیار کر لیا۔

ان کا کہنا تھا کہ پارلیمان میں دو مرتبہ عددی اعتبار سے شکست کے بعد حکومت کا پارلیمان کے مشترکہ اجلاس سے بھاگنا بوکھلاہٹ کا ثبوت ہے۔

انہوں نے کہا کہ حکومتی اراکین تک کی مکمل حمایت عمران خان کو دستیاب نہیں ہے، وزیراعظم پارلیمان میں اپنی اہمیت کھو چکے ہیں۔

شازیہ مری نے کہا کہ پی ٹی آئی کے اراکین پارلیمان خود حکومت سے بیزار ہو چکے ہیں، اب صرف عمران خان کا چل چلاؤ ہے۔

ان کا مزید کہنا تھا کہ عمران خان نہ عوام کا سامنا کر سکتے ہیں اور نہ پارلیمان میں عوامی نمائندوں کا۔