سابق وزیر اعظم پاکستان اور مسلم لیگ (ن) کے رہنما شاہد خاقان عباسی نے کہا ہے کہ قانون سازی کے لیے مشترکہ اجلاس بلایا گیا لیکن قانون سازی عوامی مسائل حل کرنے کے لیے نہیں تھی۔ بھارتی ایجنٹ کلبھوشن یادیو کو تو این آر او دیا گیا۔

قانون سازی پر مزید بات کرتے ہوئے انہوں نے کہا کہ قانون سازی میں عوام کی رائے شامل نہ ہو تو اس کی کوئی حیثیت نہیں ہوتی لیکن یہاں اتحادیوں کو دھمکیاں دے کر قانون سازی کرائی گئی ہے۔ ٹیلی فون کی دھمکیوں پر کی جانے والی قانون سازی کبھی کامیاب نہیں ہوتی۔

شاہد خاقان عباسی نے پشاور میں جلسے سے خطاب کرتے ہوئے کہا کہ مہنگائی میں مسلسل اضافہ ہو رہا ہے، حکومت سے ہمارا سوال ہے کہ ملک میں مہنگائی کیوں ہوئی؟

شاہد خاقان عباسی نے کہا کہ ملک میں گیس کی کمی کیوں ہوئی؟ کسی کے پاس کوئی جواب نہیں ہے اور عوام پر ایسے لوگوں کو مسلط کیا گیا جو عوامی نمائندے نہیں ہیں۔ پی ڈی ایم واحد پلیٹ فارم ہے جو ملک میں مہنگائی اور عوام کی بات کرتا ہے۔

انہوں نے کہا کہ آج مہنگائی کی وجہ سے ملک کا ہر شخص شدید پریشان ہے لیکن آج ہم سب ملک کے لیے اکٹھے ہوئے ہیں۔ حکومت ای وی ایم کے ذریعے انتخابات چوری کرنا چاہتی ہے۔ شاہد خاقان نے مزید کہا کہ ای وی ایم لانے کا مقصد انتخابات چوری کرنا ہے۔

شاہد خاقان عباسی نے کہا کہ ملک کے چیف جسٹس پر انتخابات کی چوری کا الزام لگا ہے، جس ملک میں ووٹ کی عزت نہیں ہوتی وہاں عوام کے مسائل حل نہیں ہوتے۔