شوگر ملیں وقت مقررہ پر شروع نہ کرنے والوں کے خلاف بڑی کارروائی متوقع ہے۔

وزیراعظم کی زیر صدارت اجلاس میں شوگر ملوں کے کرشنگ سیزن شروع کرنے کا پلان دے دیا گیا۔

کین کمشنر زمان وٹو نے وزیراعظم عمران خان کو بریفنگ دیتے ہوئے کہا کہ پنجاب کی شوگر ملوں کے پاس 40 ہزار میٹرک ٹن چینی موجود ہے اور تین شوگر ملیں 15 نومبر سے قبل گنا بیلنا شروع کر دیں گی۔

شوکت ترین کو شوگر ملز مالکان سے بات چیت کرنے کا ٹاسک دے دیا گیا، شوکت ترین شوگر ملز مالکان کو وقت سے پہلے کرشنگ سیزن شروع کرنے پر آمادہ کریں گے۔

اجلاس میں جنوبی پنجاب کی شوگر ملیں 15 نومبر تک نہ چلنے کی صورت میں شوگر ملیں سیل کرنے کی تجویز ہوئی ہے اور 20 نومبر تک کرشنگ شروع نہ کرنے پر سینٹرل پنجاب کی شوگر ملوں کو بھی وارننگ دی جائے گی۔

ذرائع کا کہنا ہے کہ درآمدی چینی لاہور سمیت پنجاب کے مختلف سیلز پوائنٹس پر 90 روپے کلو کے حساب سے فروخت کی جا رہی ہے۔