امیر جماعت اسلامی سراج ا لحق نے کہا ہے کہ پی ٹی آئی نے مہنگائی کا 74 سالہ ریکارڈ توڑ دیا ہے۔

سراج الحق نے اپنے بیان میں کہا کہ آئی ایم ایف کی فرمائش پر منی بجٹ عوام پر ناقابل برداشت کاری ضرب ہے، عالمی جریدوں کی رپورٹ کے مطابق پاکستان دنیا کا چوتھا مہنگائی ترین ملک بن چکا ہے۔

ان کا کہنا تھا کہ حکومت درپیش چیلنجز سے نمٹنے کے بجائے مسائل میں اضافہ کر رہی ہے، عوام مہنگائی اور غربت سے لڑ رہی ہے اور کھلاڑی آپس میں دست و گریباں ہیں۔

انہوں نے کہا کہ قوم جانتی ہے لوگوں کے مسائل حل کرنے کی جدوجہد صرف جماعت اسلامی کر رہی ہے، کراچی ہو یا گوادر جماعت اسلامی سڑکوں پر بیٹھ کر عوام کا حق مانگ رہی ہے۔

امیر جماعت اسلامی نے کہا کہ یقین ہے سود سے پاک معیشت ملک کو درپیش مسائل کا حل ہے، سرمایہ داروں اور مافیاز نے 22 کروڑ عوام کو یرغمال بنایا ہوا ہے۔

سراج الحق نے مزید کہا کہ الیکشن میں حکمرانوں کو اپنے کیے کا جواب دہ ہونا پڑے گا، عوام کی محرومیاں بڑھتی رہیں تو نتائج خطرناک ہو سکتے ہیں۔