ترجمان مسلم لیگ ن نے کہا ہے کہ عدم اعتماد معاشرے سے غلاظت کے اس ڈھیر اور عدم برداشت کے منبع کو ہٹانے کے لئے لائی جارہی ہے۔

پاکستان مسلم لیگ (ن) کی ترجمان مریم اورنگزیب نے وزیراطلاعات فواد چوہدری کے بیان کو حقائق کے برعکس قرار دیتے ہوئے اپنے خیالات کا اظہار کیا ہے۔

اپنے خیالات کا اظہار کرتے ہوئے انہوں نے کہا کہ جس نے معاشرے میں تقسیم ، انتشار، فساد پیدا کیا، اس کا نام عمران خان ہے۔

انہوں نے کہا کہ عمران صاحب کو یہ باتیں سمجھائیں جنہوں نے سیاست کو دشمنی میں بدل دیا ہے کیونکہ بات چیت سیاستدانوں سے ہوتی ہے، گالیاں دینے والے غنڈوں اور بدمعاشوں سے کوئی بات نہیں کرتا ہے۔

 ان کا کہنا تھا کہ سیاسی مخالفین کو گالیاں اور دھمکیاں دو، سزائے موت کی چکیوں میں ڈالو، بیٹیوں اور بہنوں کو جیلوں میں ڈالو، بے بنیاد الزامات لگاﺅ اور پھر توقع کرو کہ آپ سے بات چیت کی جائے۔

انہوں نے مزید کہا کہ سیاست میں گند اور غلاظت عمران صاحب نے ڈالا ہوا ہے اور اس گندگی اور غلاظت کو صاف کرکے معاشرے میں پھیلے تعفن اور گھٹن کو ختم کریں گے۔

خیال رہے کہ اس سے قبل وفاقی وزیر فواد چوہدری نے کہا تھا کہ وزیراعظم کے خلاف عدم اعتماد کی تحریک نے سیاست میں تلخیاں پیدا کردیں ہیں۔

اپوزیشن کی بغیر سوچے سمجھے عدم اعتماد کی تحریک نے سیاست میں تلخیاں ہیدا کر دیں، جمہوریت اتنی انتہائ تقسیم کا نظام نہیں ہے اس میں کم از کم اتفاق رائے پر نظام استوار ہوتا ہے،سمجھتا ہوں اتنی تقسیم نہ ہو کہ کسی بھی سبب گفتگو ہی مشکل ہو جائے لڑنا مشکل نہیں بعد میں صلح مشکل ہوتی ہے

— Ch Fawad Hussain (@fawadchaudhry) March 12, 2022

 انہوں نے اپنے پیغام میں واضح کیا کہ جمہوریت اتنی انتہائی تقسیم کا نظام نہیں ہے اس میں کم از کم اتفاق رائے پر نظام استوار ہوتا ہے۔

 ان کا کہنا تھا کہ لڑائی کرنا مشکل نہیں ہوتا ہے لیکن بعد میں صلح ضرور مشکل ہوجاتی ہے اور اپوزیشن کی جانب سے بغیر سوچے سمجھے تحریک عدم اعتماد نے سیاست میں تلخیاں پیدا کردیں ہیں۔