وزیر اعظم عمران خان کی جانب سے وفاقی کابینہ کا طلب کیا جانے والا اجلاس ایک بار پھر ملتوی کردیا گیا ہے۔

وزیراعظم مستقل اپوزیشن کی تحریک کو ناکام کرنے کیلیے سیاسی مشاورت میں مصروف ہیں جس کی وجہ سے مسلسل 3 مرتبہ وفاقی کابینہ کا اجلاس ملتوی کیا گیا ہے۔

خیال رہے کہ وزیر اعظم عمران خان کی زیر صدارت کابینہ کا اجلاس 8 مارچ کو وزیراعظم ہاؤس میں طلب کیا گیا تھا جس میں ملکی سیاسی معاشی صورتحال پر بات چیت کی جانی تھی۔

اس اجلاس کے لئے 24 نکاتی ایجنڈا بھی پیش کیا گیا تھا جس میں تحریک عدم اعتماد سمیت سیاسی امور پر اہم فیصلے کیے جانے تھے۔

یاد رہے کہ جاری کیے جانے والے ایجنڈے کے مطابق سرکاری اداروں کے سی ای اوز کی تقرری پر کابینہ کے فیصلوں پر بریفنگ پیش کی جائیگی۔

دوران اجلاس وزیر اعظم کابینہ کو دورہ روس پر اعتماد میں لیتے ہوئے روس یوکراین جنگ کے پاکستان پر اثرات پر بات چیت کی جائیگی۔

ایجنڈے میں شامل وفاقی کابینہ اسلام آباد میں ایک عمارت کا نام ڈاکٹر عبدالقدیر کے نام پر رکھنے کی منظوری دے گی۔

اجلاس میں وزارت داخلہ کی ویزہ پالیسی میں ردوبدل سے متعلق 2 سمریاں پیش کی جائیگی۔

علاوہ ازیں پاکستان کی 75 ویں سالگرہ کے موقعہ پر یادگاری نوٹ جاری کرنے کی منظوری ایجنڈے میں شامل کی گئی ہے۔

نیلم جہلم ہائیڈروپاور کمپنی کے سی ای او کی تعیناتی کے معاملے سمیت ای سی سی، قانونی معاملات پر کابینہ کمیٹیوں کے فیصلوں کی توثیق کی جائیگی۔

کابینہ اور کمیٹیوں میں سمریاں تاخیر سے بھیجنے پر رپورٹ پیش کی جائے گی جبکہ وزیر منصوبہ بندی معاشی اعشاریوں پر بریفنگ دینگے۔

اجلاس کے دوران قومی اسپورٹس پالیسی 2022 کابینہ میں منظوری کےلئے پیش ہوگی جبکہ پی ایس کیو سی اے کی مارکنگ فیس پر نظر ثانی کا معاملہ بھی پیش کیا جائیگا۔

جاری کیے جانے والا ایجنڈے میں فیڈرل گورنمنٹ پراپرٹیز مینجمنٹ اتھارٹیز بورڈ کے آزاد ممبران، سنٹرل پاور پرچیزنگ ایجنسی کے سی ای او، پاور پلاننگ اینڈ مانیٹرنگ کمپنی کے ایم ڈی، ڈی جی پی ایس کیو سی اے کی تقرری  کا معاملہ شامل کیا گیا ہے۔