ضلع اوکاڑہ کے ایک گاؤں میں ایک ماڈل اپنے بھائی کے ہاتھوں غیرت کے نام پر قتل ہوگئی۔

رینالہ خورد کے نواحی گاؤں پانچ ون آر میں ایک بار پھر ’قندیل بلوچ ‘ کی ایک طرح ایک بہن کو بھائی نے غیرت کے نام پر مار ڈالا۔ ماڈل سدرہ فیصل آباد سے عید منانے اپنے گھر آئی تھی۔

ذرائع کے مطابق 22 سالہ سدرہ اسلام آباد میں ماڈلنگ کے شعبے سے وابستہ تھی اور اس کو بھائی کی جانب سے شدید مخالفت کا سامنا تھا۔

سدرہ عید کی چھٹیوں میں اپنے آبائی گھر آئی ہوئی تھی جہاں اس کے بھائی نے غیرت کے نام پر اس کو قتل کیا اور موقع سے فرار ہو گیا۔

اطلاع ملنے پر مقامی پولیس نے ماڈل سدرہ کی لاش پوسٹمارٹم کے لیے اسپتال منتقل کردی۔

جبکہ مفرور کی گرفتاری کے لیے پولیس چھاپے مار رہی ہے۔

 پولیس اس حوالے سے مزید تحقیقات کر رہی ہے۔

اس سے قبل جولائی 2016 میں قندیل بلوچ کو ان کے بھائی نے بے رحمی سے قتل کیا تھا۔