پاکستان تحریک انصاف کے رہنماؤں کے الیکشن کمیشن میں داخل ہونے پر پابندی عائد کردی گئی ہے۔

تفصیلات کے مطابق پی ٹی آئی کا الیکشن کمیشن کے باہر احتجاج کے معاملے پر چیف الیکشن کمشنر کی زیر صدارت الیکشن کمیشن میں اہم اجلاس منعقد ہوا۔

اجلاس کے دوران ڈپٹی کمشنر نے الیکشن کمیشن کی سیکیورٹی صورتحال پر حکام کو آگاہ کیا اور بتایا کہ کسی کو الیکشن کمیشن میں داخلے کی اجازت نہیں کی جائے گی۔

اجلاس میں چیف الیکشن کمشنر کی جانب سے پی ٹی آئی رہنماؤں کو  الیکشن کمیشن میں داخل نہ ہونے دینے کا فیصلہ کیا گیا ہے۔

اس حوالے سے ڈپٹی کمشنر اسلام آباد نے الیکشن کمیشن کے باہر گیس ماسک اور آنسو گیس کے شیل پہنچانے کی ہدایات کردی ہے۔

اس سے قبل  پی ٹی آئی کے الیکشن کمیشن کے سامنے احتجاج کے پیش نظر اسلام آباد پولیس نے سینکڑوں پولیس اہلکاروں کی تعیناتی کے ساتھ ریڈ زون کے راستوں کو سیل کر دیا ہے۔

اس حوالے سے پولیس حکام کا کہنا ہے کہ ریڈ زون میں داخلے پر پابندی عائد ہے جس کی پیش نظر کسی بھی قسم کے احتجاج یا اجتماع کی اجازت نہیں ہوگی۔

حکام نے بتایا کہ قانونِ کی خلاف ورزی کرنے والوں سے سختی سے نمٹا جائے گا۔

سرکاری ملازمین، میڈیا اور عدالتوں میں  پیش ہونے والے سائلین مارگلہ  روڈ استعمال کریں جبکہ ڈپلومیٹک انکلیو میں داخلہ کےلیے تھرڈ روڈ استعمال کی جائے گی۔

اس سے قبل وفاقی وزیر داخلہ رانا ثنااللہ نے کہا کہ تحریک انصاف احتجاج کے نام پر انتشار پھیلانا چاہتی ہے لیکن انہوں نے کل قانون ہاتھ میں لینے کی کوشش کی تو سختی سے نمٹا جائے گا۔