بھارت نے دریائے راوی میں پانی چھوڑ دیا جس کے باعث بیراج میں اونچے درجے کا سیلاب متوقع ہے۔

تفصیلات کے مطابق بھارت کے دریائے راوی میں پانی چھوڑنے کے فوری بعد اوج بیراج پر پانی کی سطح تیزی سے بلند ہونے لگی ہے۔

جوائنٹ کمشنر انڈس واٹر نے پی ڈی ایم اے سمیت متعلقہ اداروں کو اطلاع کرتے ہوئے چیف سیکرٹری گلگت بلتستان سمیت آزاد جموں و کشمیر اور چاروں صوبائی سیکرٹریز کو مراسلہ جاری کر دیا ہے۔

ذرائع انڈس واٹر کمشنر کا کہنا ہے کہ بھارت نے سہ پہر پانی چھوڑنے کی پیشگی اطلاع دی تھی۔

ذرائع کا کہنا ہے اوج بیراج سے ایک لاکھ 71 ہزار 797 کیوسک پانی گزر رہا ہے، انتظامیہ نے بیراج کو بچانے کے لیے اسپیل وے کھول دیے ہیں، بیراج میں اونچے درجے کا سیلاب متوقع ہے۔

ذرائع کا کہنا ہے کہ بھارت نے دریائے توی میں بھی پانی چھوڑ دیا ہے جس کے باعث جموں توی میں درمیانے درجے کا سیلاب متوقع ہے، جموں توی سے 73 ہزار 900 کیوسک پانی گزر رہا ہے۔

محکمہ موسمیات نے دریائے راوی میں سیلاب کی وارننگ جاری کر دی

پی ڈی ایم اے کے مطابق بھارت نے اُجھ بیراج سے 1530 PST پر 1,71,797 کیوسک پانی چھوڑا ہے، دریائے راوی میں درمیانے سے اونچی سطح کے سیلاب کا امکان ہے۔

ادارے نے کہا کہ راوی میں اونچے بہاؤ سے گوجرانوالہ، لاہور اور ملتان ڈویژن کے ندی نالوں میں طغیانی آسکتی ہے، دریائے راوی سے منسلک ندی نالوں میں پانی کی سطح بلند ہو سکتی ہے جس سے علاقے میں سیلاب بھی آسکتا ہے۔

پی ڈی ایم اے نے کہا کہ تمام اضلاع پیشگی انتظامات مکمل کریں، مشینری اور عملے کو الرٹ رکھا جائے، تمام ادارے ہنگامی صورتحال سے نبرد آزما ہونے کے لیے تیار رہیں۔