پاکستان تحریک انصاف کے چیئرمین عمران خان نے کہا ہے کہ وکلاء برادری قانون دستور کی حکمرانی کی اس جدوجہد میں آگے بڑھیں۔

تفصیلات کے مطابق پنجاب بار کونسل کے سینئر اراکین نے چیئرمین تحریک انصاف عمران خان سے خصوصی تفصیلی ملاقات کی جس میں ملکی مجموعی سیاسی صورتحال اور باہمی دلچسپی کے امور پر تفصیلی تبادلۂ خیال ہوا۔

چیئرمین تحریکِ انصاف نے اس موقعے پر سینئر ماہرینِ قانون اور بار اراکین کو حقیقی آزادی کی تحریک میں شرکت کی دعوت دی۔

عمران خان نے کہا کہ عدل و انصاف پر مبنی معاشرے کا قیام اہم ترین ضرورت ہے۔

ان کا کہنا تھا کہ عدم مساوات اور قانون سے انحراف کی روایت نے سنگین پیچیدگیوں کو جنم دیا ہے، مستحکم جمہوریت اور فلاحی ریاست کی بنیاد قانون کی حکمرانی پر استوار ہوتی ہے۔

انہوں نے مزید کہا کہ وکلاء برادری آگے بڑھے اور حقیقی آزادی و قانون دستور کی حکمرانی کی جدوجہد میں کردار ادا کرے۔