چیئرمین پی ٹی آئی عمران خان کی جانب سے پنجاب حکومت کو عوام کو ریلیف دینے کیلئے تمام تر کاوشیں بروئے کار لانے کی ہدایت کی گئی ہے۔

تفصیلات کے مطابق چیئرمین پاکستان تحریک انصاف عمران خان اور وزیر اعلیٰ پنجاب چوہدری پرویز الٰہی کی ملاقات ہوئی ہے۔

ملاقات کے دوران سیاسی صورتحال،صوبے کے عوام کو ریلیف دینے کے اقدامات پر بات چیت  سمیت  پنجاب میں ترقیاتی منصوبوں اور عوام کے مسائل کے فوری حل کے لائحہ عمل پر بھی گفتگو   کی گئی ہے۔

اس موقع پر وزیر اعلیٰ چوہدری پرویزالٰہی نے عوام کو ریلیف کی فراہمی اور سیلاب متاثرین کی بحالی کے اقدامات سے آگاہ کیا  اور تعلیمی اداروں میں منشیات کے خاتمے کیلئے قانون سازی کے بارے میں بھی عمران خان کو بریف کیا۔

عمران خان نے سیلاب زدگان کی بحالی و آبادکاری کیلئے پنجاب حکومت کے اقدامات کو سراہا اور حکومت پنجاب کے اقدامات کی تعریف کی ۔

اس موقع پر عمران خان نے پنجاب کے عوام کو ریلیف دینے کیلئے تمام تر کاوشیں بروئے کار لانے کی ہدایت  کی اور کہا کہ پنجاب حکومت کے مالی امداد کے پیکیج سے سیلاب متاثرین کی بحالی و آبادکاری جلد ممکن ہوگی۔

چیئرمین پاکستان تحریک انصاف عمران خان کی وزیراعلی آفس آمد: وزیر اعلی پنجاب چودھری پرویزالٰہی نے عمران خان کا خیر مقدم کیا۔ pic.twitter.com/Q2V6fOxH18

— Government of Punjab (@GovtofPunjabPK) September 26, 2022

عمران خان نے کہا کہ سابق حکومت نے ہمارے انقلابی فلاحی پروگرامز کو روک کر صوبے کے عوام سے زیادتی کی تاہم بلاتاخیر فلاح عامہ کے پروگراموں کو تیزی سے آگے بڑھایا جائے تاکہ عوام کو ریلیف مل سکے۔

وزیراعلیٰ پنجاب نے بتایا کہ حکومت نے پنجاب کے تمام اسپتالوں میں سولرپینلزلگانے کا فیصلہ کیا ہے تاہم اسپتالوں کو مرحلہ وار پروگرام کے تحت سولر انرجی پر منتقل کیا جائے گا۔

انہوں نے بتایا کہ  تعلیمی اداروں کو منشیات سے پاک کرنے کیلئے کڑی قانون سازی کی جارہی ہے جبکہ کالجوں اور یونیورسٹیوں وغیرہ میں منشیات فروشی پر سخت سزائیں تجویزکررہے ہیں جس کے تحت کم از کم سزا دو سال اورزیادہ سے زیادہ عمر قید تک رکھنے کے لئے قانون سازی کررہے ہیں۔

انہوں نے مزید بتایا کہ تعلیمی اداروں میں منشیات فروشی اوراستعمال پر ادارے کے مالکان اورملازمین بھی ذمہ دار ہونگے۔

چوہدری پرویز الٰہی کا کہنا تھا کہ صوبت بھر میں منشیات فروشی کے سدباب کیلئے خود مختار ادارہ، اسپیشل کورٹس قائم کیے جائیں گے۔

ان کا کہنا تھا کہ بارشوں اورسیلاب سے جاں بحق افراد کے لواحقین کو 10،10لاکھ روپے فی کس مالی امداد دی ہے، گھروں، فصلوں اورلائیو اسٹاک کو پہنچنے والے نقصانات کے ازالے کیلئے امدادی رقم میں اضافہ کیا ہے۔

انہوں نے بتایا کہ عمران خان کی ہدایات کے مطابق ہی صوبے بھر میں نئے ترقیاتی منصوبے شروع کئے جارہے ہیں جس کا محورعام آدمی کی فلاح وبہبود ہے۔

انہوں نے یقین دہانی کرائی کہ عوام کو ریلیف دینے کیلئے ہرممکن اقدامات اٹھائے جارہے ہیں ۔