راجہ بشارت نے کہا ہے کہ میرٹ پر پورا اترنے والے قیدیوں کو قانون کے تحت پیرول پر رہائی کا حق ہے۔

تفصیلات کے مطابق وزیر پارلیمانی امور راجہ بشارت کی زیر صدارت کابینہ کمیٹی لا اینڈ آرڈر کا اجلاس ہوا جس میں اہم فیصلے کئے گئے ہیں۔

اجلاس میں بابا گورونانک جی کے 553 ویں جنم دن کی تقریبات کے انتظامات اور سکیورٹی کی منظوری دی گئی ہے جبکہ یہ فیصلہ بھی کیا گیا ہے کہ بھارت سے 3 ہزار اور اندرون ملک سے 10 سے 15 ہزار سکھ اور ہندویاتری شرکت کریں گے۔

جنم استھان ننکانہ صاحب میں جنم دن کی مرکزی تقریب 8 نومبر کو ہوگی جبکہ یاتریوں کی آمد 6 نومبر سے شروع ہوجائے گی۔

راجہ بشارت نے کہا کہ سکھ یاتریوں کو ہر مقدس مقام پر تمام ضروری سہولیات کی فراہمی یقینی بنائیں گے۔

اس موقع پر کابینہ کمیٹی نے فرانزک ایجنسی کو اضافی گرانٹ کی درخواست سپلیمنٹری بجٹ میں شامل کرانے کی ہدایت دی۔

اجلاس میں کچے کے علاقے میں جرائم پیشہ گروہوں کے خلاف آپریشن کے لئے اضافی فنڈز کی فراہمی پر بھی غور کیا گیا ہے۔

   راجہ بشارت نے کہا ہے کہ کچے کے علاقے میں دو اضلاع سے 1675 پولیس نفری تعینات کر دی گئی ہے۔

انہوں نے کہا کہ پیرول بورڈ کی تشکیل نو کا فیصلہ، جیلوں پر بوجھ کم کرنا ہوگا۔

پنجاب پیرول بورڈ میں پولیس، سپیشل برانچ اور سی ٹی ڈی کو نمائندگی دینے کی ہدایت کردی گئی ہے۔

وزیر پارلیمانی امور راجہ بشارت نے مزید کہا کہ پیرول بورڈ کا 100 میں سے 46 درخواستیں مسترد کرنا مناسب نہیں ہے جبکہ میرٹ پر پورا اترنے والے قیدیوں کو قانون کے تحت پیرول پر رہائی کا حق حاصل ہے۔

 اجلاس میں وزیر ٹرانسپورٹ منیب سلطان چیمہ اور متعلقہ افسروں نے بھی شرکت کی