لاہور: پاکستان تحریک انصاف کے چیئرمین عمران خان کی طبیعت ناساز ہوگئی ہے۔

ذرائع نے بتایا کہ گزشتہ روز بھی سارا دن چیئرمین پی ٹی آئی عمران خان تیز بخار میں مبتلا تھے، رہنماؤں کی جانب سے آرام کے مشورے کے باوجود عمران خان خود تمام ریلیوں کو مانیٹر کرتے رہے۔

ذرائع کا کہنا تھا کہ گزشتہ روز تقریر سے قبل ڈاکٹر فیصل سلطان کی سربراہی میں ڈاکٹرز کا وفد زمان پارک پہنچا، طبیعت ناسازی کے باوجود عمران خان نے اہم خطاب کیا۔

ذرائع نے مزید بتایا کہ تقریر کے بعد ڈاکٹرز نے عمران خان کا مکمل طبی معائنہ کیا، جس کے بعد عمران خان کو ڈائریا کی شکایات ہوئی ہیں، ڈاکٹرز آج دوبارہ عمران خان کا معائنہ کریں گے۔

عمران خان کا 23 دسمبر کو پنجاب اور خیبرپختونخوا اسمبلی تحلیل کرنے کا اعلان

گزشتہ روز چیئرمین پی ٹی آئی عمران خان کا کہنا تھا کہ ہم نے فیصلہ کیا ہے کہ ہم اگلے جمعے کو دونوں اسمبلیاں تحلیل کردیں گےاور اس کے بعد الیکشن کی تیاری کریں گے اور اس کے بعد قومی اسمبلی میں جاکر اسپیکر کے سامنے کہیں گے کہ ہمارے استعفیٰ منظور کریں۔

سابق وزیراعظم عمران خان زمان پارک لاہور میں اپنی رہائش گاہ پر وزیراعلیٰ پنجاب پرویز الہیٰ اور وزیراعلیٰ خیبرپختونخوا محمود خان کے ہمراہ خطاب کرتے ہوئے کہا کہ قوم کو بتانا چاہتا ہوں کہ میں اس نتیجے پر کیسے پہنچا، میرا جینا مرنا پاکستان میں ہے ، میں نے کبھی پاکستان سے باہر رہنے کا نہیں سوچا۔

یہ بھی پڑھیں؛ ہماری جدو جہد عوام اور قانون کی بالادستی کے لیے ہے، عمران خان

عمران خان نے کہا کہ میں آج ان پاکستانیوں کی بات کر رہا ہوں جو سمجھتے ہیں ان کا جینا مرنا پاکستان میں ہے، ان کی بات نہیں کر رہا جو یہاں چوری کرکے پیسہ باہر بھیجتے ہیں۔

انہوں نے کہا کہ مایوسی کا یہ عالم ہے کہ ساڑھے 7 لاکھ پاکستانی ملک چھوڑ کر چلے گئے ہیں،  7 ماہ کے دوران بیرون ملک جانے والے یہ افراد پروفیشنل تھے، آج کسی ایک چیز میں بھی بہتری بتا دیں۔

سابق وزیراعظم نے کہا کہ مجھے فخر ہے میں نے کسانوں کی مدد کی، ملکی تاریخ میں سب سے زیادہ مہنگائی اس دور میں ہے، آج 50 سال کے بعد سب سے زیادہ مہنگائی ہوئی ہے۔