پاکستان تحریک انصاف کے سینئر رہنما پرویز خٹک نے کہا ہے کہ اسمبلی تحلیل کرنے کی تاریخ صرف عمران خان کو معلوم ہے۔

تفصیلات کے مطابق پاکستان تحریک انصاف کے سینئر رہنما پرویز خٹک نے زمان پارک کے باہر میڈیا سے گفتگو کرتے ہوئے کہا کہ ابھی تک اسمبلی تحلیل کی تاریخ کا فیصلہ نہیں ہوا ہے جبکہ پنجاب اور کے پی کے اسمبلی کی تحلیل کی تاریخ صرف عمران خان کو معلوم ہے۔

انہوں نے کہا کہ اسمبلی کس تاریخ کو تحلیل کرنی ہے یہ صرف عمران خان کے ذہن میں ہے، ہفتے کے روز عمران خان اسمبلی تحلیل کی تاریخ کا اعلان کریں گے۔

ان کا کہنا تھا کہ حکومت سے کیا مذاکرات ہورہے ہیں میرے علم میں نہیں ہے جبکہ مذاکرات کے حوالے سے صرف صدر مملکت ہی بہتر بتا سکتے ہیں۔

پرویز خٹک نے کہا کہ ق لیگ اہم اتحادی ہے، ق لیگ والے اپنی کمٹمنٹ پر کھڑے ہیں۔

انہوں نے کہا کہ پی ڈی ایم کے ماہرین نے ملک کو جس گرداب میں پھنسا دیا اس سے نکلنے کا راستہ صرف انتخابات ہیں۔

ان کا کہنا تھا کہ چوہدری نثار سے کوئی رابطہ نہیں ہے لیکن انہیں مشورہ دوں گا کہ سیاست کریں۔

تحریک انصاف کے سینئر رہنما پرویز خٹک نے مزید کہا کہ حکومت کے ساتھ مذاکرات مشروط ہیں جبکہ ان مذاکرات میں الیکشن کی تاریخ پر بھی گفتگو ہونی چاہیئے۔