پاکستان تحریک انصاف کے رہنما اسد عمر نے کہا ہے کہ موجودہ حکمران جمہوریت کے بنیادی اصول پامال کررہے ہیں، ان کو سمجھ آگئی کہ عمران خان سے مقابلہ نہیں کیا جاسکتا ہے۔

تفصیلات کے مطابق مرکزی سیکرٹری جنرل پاکستان تحریک انصاف اسد عمر نے پی ٹی آئی رہنماؤں کے ہمراہ اہم پریس کانفرنس کرتے ہوئے کہا کہ اسلام آباد اور لاہور میں آئین کے ساتھ کھلواڑ ہورہا ہے۔

انہوں نے کہا کہ حکومت عوام سے اور عمران خان سے خوفزدہ ہے، یہ لوگ عوام کا سامنا نہیں کرسکتے اور جہاں ان کو عوام کا سامنا کرنا پڑے وہاں سے یہ بھاگ جاتے ہیں۔

انہوں نے کہا کہ پہلے عمران خان سے خوفزدہ تھےاب عوام سےبھی خوفزدہ ہیں، ان کو خوف عوام میں جانےکا ہے کہ کہیں ووٹ نہ مانگناپڑ جائے۔

یہ بھی پڑھیں: انتخابات میں امپورٹڈ حکومت کو شکست کا سامنا کرنا پڑے گا، اسد عمر

اسد عمر نے بتایا کہ ملک میں ڈالر کی کمی خطرناک حد تک پہنچ گئی ہے اور ڈالرزکی کمی سے سفارتخانوں میں تنخواہ دینے کے پیسے نہیں ہیں۔

ان کا کہنا تھا کہ آج عوام تاریخ کی سب سے بڑی مہنگائی برداشت کررہےہیں جس دوران تقریباً 15 لاکھ لوگ بے روزگار ہو چکے ہیں، کسان تباہ ہوگیا، بلیک مارکیٹ ڈالروں کے لیے کھل چکی ہے، ترسیلات زر کم ہوتی جارہی ہیں اور پاکستان کو ہر طریقے سے نقصان پہنچایا جارہا ہے۔

انہوں نے بتایا کہ لوگ پوچھتے ہیں اسٹیبلشمنٹ کے ساتھ تعلقات اچھے ہیں یا نہیں ہیں لیکن ہم صرف پاکستان کی عوام کو دیکھ رہے ہیں ، نہ ہم اسٹیبلشمنٹ اور نہ ہی کسی بیرونی طاقت کو دیکھ رہے ہیں۔

گورنر پنجاب کا خط دیکھ کر سمجھ نہیں آتی کہ ہنسیں یا روئیں:

رہنما پی ٹی آئی کا کہنا تھا کہ گورنرپنجاب کا خط دیکھ کر سمجھ نہیں آتی کہ ہنسیں یا روئیں جس کا نہ تو سر ہے نا پیر ۔

ان کا کہنا تھا کہ پرویز الٰہی نے جب عمران خان کے ساتھ بیٹھ کر اسمبلیاں تحلیل کرنے کا اعلان تو ان کو خیال آیا کہ اسمبلی میں پی ٹی آئی کی اکثریت نہیں ہے ۔

انہوں نے بتایا کہ دسمبر میں الیکشن سے ایک ہفتے قبل ان کو خیال آیا کہ اسلام آباد کی آبادی بہت بڑھ گئی ہے جبکہ حکومت الیکشن سے بھاگنا چاہتی تھی جس کے پیش نظر انہوں نے یونین کونسل ایکٹ میں ترمیم کی اور اب یہیہ عدلیہ کا بھی امتحان ہے ۔

انہوں نے کہا کہ معاملات عدلیہ کی طرف جارہے ہیں اور عوام کی امیدیں عدلیہ سے ہے ۔

 مزید پڑھیں؛عمران خان پر توشہ خانہ کیس میں صرف سیاسی انتقام لینے کی کوشش ہو رہی ہے، اسد عمر

یہ ہر طرح سے ناکام ہوگئے ہیں:

اسد عمر کا کہنا تھا کہ توشہ خانہ کیس کچھ بھی نہیں ہے تو یہ عمران خان کو ٹیکنکل ناک آئوٹ کروانے کی کوشش کر رہے ہیں  لیکن موجودہ حکومت یہ ہر طرح سے ناکام ہوچکی ہے اور سیاسی، اخلاقی ، عدالتی محاذ پر ہر طرح ناکام ہونے کے بعد انہوں نے سوچا اس کو جسمانی طور پر ختم کردیا جائے لیکن اللہ نے عمران خان سے ابھی بہت کام لینے ہیں ۔