وزیر اعظم کے معاون خصوصی برائے داخلہ عطا تارڑ نے الزام لگایا ہے کہ عمران خان نے توشہ خانہ تحائف فروخت کر کے کرپشن کی۔

مسلم لیگ ن کے ڈپٹی سیکریٹری جنرل عطا اللہ تارڑ نے اسلام آباد میں میڈیا سے گفتگو کرتے ہوئے کہا کہ 5 سے  6ارب روپے کیسے کرپشن کی نذر ہوئے، جعلی رسیدوں سے کام لیا گیا۔

‘یہ کہنا آسان ہے میری گھڑی میری مرضی’

انہوں نے کہا کہ توشہ خانہ  کے قوانین  واضح ہیں، یہ کہنا آسان ہے میری گھڑی میری مرضی، توشہ خانہ کے تحفے پاس رکھے جاسکتے ہیں فروخت نہیں ہوسکتے۔

عطا تارڑ نے کہا کہ عمران خان نے توشہ خانہ تحائف فروخت کرکے کرپشن کی، کسی ملک  کے بادشا ہ یا صدر کی جانب سے ملے تحفے نایاب ہوتے ہیں۔

مزید پڑھیں: توشہ خانہ کیس؛ عمران خان کی نا اہلی کے خلاف پٹیشن کی جلد سماعت کیلئےدرخواست دائر

انکا کہنا تھا کہا کہ 2021 میں تحفے میں بلغاری کا سیٹ آیا، سیٹ کی  ویلیو 58 لاکھ روپے رکھی گئی، بلغاری سیٹ کی قیمت 5ملین ڈالر بتائی گئی، 29لاکھ روپے سرکاری خزانے میں جمع کرائے گئے۔

وزیر اعظم کے معاون خصوصی نے مزید کہا کہ ایک اور دوست ملک نے تحفہ دیا جس کی ویلیو 58 لاکھ روپے رکھی گئی۔

عمران خان نے توشہ خانہ سے جتنے تحائف لئے وہ ان کے اثاثوں میں ڈکلیئرڈ ہیں

گزشتہ روز پاکستان تحریک انصاف کے سینئر رہنما و سابق رکن قومی اسمبلی فرخ حبیب نے توشہ خانہ سے متعلق اپنے ویڈیو پیغام میں کہا تھا کہ عمران خان نے توشہ خانہ سے جو تحائف لیے وہ قانون کے مطابق قیمت ادا کر کے حاصل کیے۔

یہ بھی پڑھیں؛ بس بہت ہوگیا! توشہ خانہ الزامات کیخلاف عمران خان کا عدالت جانے کا اعلان

فرخ حبیب نے کہا کہ عمران خان نے توشہ خانہ سے جتنے تحائف لئے وہ ان کے اثاثوں میں ڈکلیئرڈ ہیں، ان کو بطور کرکٹر پلاٹ تحفے میں ملے جو کہ انہوں نے شوکت خانم ہسپتال کو عطیہ کر دیے، نواز شریف اور زرداری توشہ خانہ سے مرسڈیز اور بی ایم ڈبلیو گھر لے کر گئے تھے جبکہ یوسف رضا گیلانی نے توشہ خانہ سے ہار چوری کیا تھا۔

نواز شریف کے دور میں توشہ خانہ کے حوالے سے معلومات کی فراہمی کو خفیہ رکھا جاتا تھا

انہوں نے اپنے پیغام میں مزید کہا کہ نواز شریف کے دور میں توشہ خانہ کے حوالے سے معلومات کی فراہمی کو خفیہ رکھا جاتا تھا۔ زرداری پر اومنی گروپ کیس، سرے محل کا کیس، کوٹیکنا کیس، آبدوزوں کے کیس موجود ہیں۔ شریف خاندان پر حدیبیہ پیپر ملز، رمضان شوگر ملز کیس، ایون فیلیڈ اپارٹمنٹس کا کیس، ٹی ٹی سکینڈل بن چکے ہیں جبکہ سلیمان شہباز جو کک بیک اسپیشلسٹ ہے، وہ بھی عمران خان پر گھٹیا گفتگو کر رہا ہے۔