قومی اسمبلی سے استعفوں کی منظوری کے معاملے پر چیئرمین تحریک انصاف عمران خان نے تمام اراکین قومی اسمبلی کو  بدھ کو اسلام آباد طلب کر لیا ہے۔

ذرائع کے مطابق تمام ارکان قومی اسمبلی کو 28 دسمبر کو دن 12 بجے کے پی ہاؤس پہنچنے کی ہدایت دے دی گئی ہے جبکہ چیئرمین تحریک انصاف عمران خان اراکین قومی اسمبلی سے ویڈیو لنک پر خطاب کریں گے۔

ذرائع نے بتایا ہے کہ تمام اراکین شاہ محمود قریشی کی زیر قیادت پارلیمنٹ ہاؤس روانہ ہوں گے، مستعفی اراکین اسپیکر قومی اسمبلی کے سامنے پیش ہو کر استعفوں کی تصدیق کریں گے۔

ذرائع کا کہنا ہے کہ پارٹی قیادت نے ہدایت دی ہے کہ کے پی ہاؤس میں اجلاس بہت اہم ہے، تمام اراکین اجلاس میں شرکت  کو یقینی بنائیں۔

ذرائع کے مطابق چیئرمین تحریک انصاف عمران خان نے سختی سے ہدایت دی ہے کہ کوئی بھی رکن غیر حاضر نہ ہو۔

میڈیا اسٹریٹجی کمیٹی کا اجلاس طلب

دوسری جانب پاکستان تحریک انصاف (پی ٹی آئی) کے چیئرمین عمران خان نے میڈیا اسٹریٹجی کمیٹی کا اجلاس طلب کرلیا ہے۔

مرکزی اور پنجاب کی سینئر لیڈ رشپ کا فالو اپ اجلاس آج دوبارہ طلب کر لیا گیا ہے، اجلاس زمان پارک میں عمران خان کی زیر صدارت ہوگا۔

اجلاس میں وزیراعلیٰ کے اعتماد کے ووٹ کے لئے حکمت عملی کو حتمی شکل دی جائے گی اور  وزیراعلیٰ چوہدری پرویزالہیٰ سے ملاقات کرنے والی کمیٹی آج عمران خان کو بریف کرے گی۔

مزید پڑھیں وزیر اعلیٰ پنجاب اعتماد کا ووٹ لیں گے، پی ٹی آئی کا اعلان

اس کے علاوہ اجلاس میں چوہدری پرویزالہیٰ اور مونس الہیٰ سے زیر بحث آنے والے معاملات سے عمران خان کو بریف کیا جائے گا۔

خیال رہے کہ زمان پارک میں سیکیورٹی کے انتہائی سخت انتظامات کردیے گئے ہیں اور عمران خان کی رہاش گاہ کے اردگرد سی سی ٹی وی کیمروں کی مدد سے نگرانی کی جارہی ہے۔