پاکستان تحریک انصاف (پی ٹی آئی) کا پنجاب کے نگراں وزیر اعلیٰ محسن نقوی کی تقرری کے خلاف صوبائی الیکشن کمشنر کے دفتر کے سامنے احتجاج جاری ہے۔

تفصیلات کے مطابق پی ٹی آئی کے کارکنان الیکشن کمشنر کے دفتر کے باہر “محسن نقوی نا منظور” اور “الیکشن کمیشن نامنظور” کے نعرے لگا رہے ہیں۔

الیکشن کمیشن کے متعصبانہ فیصلے کیخلاف عوام کی بڑی تعداد الیکشن کمیشن آفس لاہور پہنچ گئی جبکہ صوبائی الیکشن کمشنر آفس کے باہر پولیس اہلکاروں کی بڑی تعداد بھی موجود ہے۔

اس موقع پر پی ٹی آئی رہنما حماد اظہر نے کہا کہ زرداری کا بیٹا ہمیں منظور نہیں، اس عوام کے صبر کو مت آزمایا جائے، محسن نقوی تم سن لو اگر کچھ ایسا کیا تو تم کو بھگتنا ہو گا۔

دوسری جانب اعجاز چوہدری نے کہا کہ حق غالب آکر رہتا ہے، سپریم کورٹ 2016 کا فیصلہ ہے جو پلی بارگین کریگا وہ عوامی عہدے پر نہیں آسکتا، نگراں وزیراعلیٰ کیخلاف احتجاج ہمارا حق ہے، آج کا احتجاج صرف لاہور میں ہوگا۔

پی ٹی آئی رہنما نے مزید کہا کہ حکومت رجیم چینج ایجنڈے پر چل رہی ہے، انتخابات کے نتائج ظاہر کرتے ہیں کہ عوام پی ٹی آئی کیساتھ ہیں۔

علاوہ ازیں پی ٹی آئی رہنما فیاض الحسن چوہان نے کہا کہ محسن نقوی نگراں وزیراعلیٰ کے معیار پر پور انہیں اترتے، 2016میں سپریم کورٹ کا فیصلہ موجود ہے، جوپلی بارگین کرے وہ سرکاری عہدہ نہیں رکھ سکتا۔

میاں اسلم اقبال نے کہا کہ کٹھ پتلی نہ بنیں، وہ فیصلے کریں جو عوام کیلئے صحیح ہوں، ان سب نے پاکستان سے باہر ہونا ہے۔

یہ بھی پڑھیں: محسن نقوی کی تقرری؛ عمران خان کا کل سے ملک بھر میں احتجاج کا اعلان

انہوں نے کہا کہ حقیقی حکمرانوں نے اقتدار میں بیٹھ کرغریبوں کےحق میں فیصلہ کرناہے، یہ سمجھتے ہیں کہ پی ٹی آئی کارکنان کو دبا لیں گے، پنجاب پر ایسے شخص کو مسلط نہ کریں جو غیرجانبدار نہ ہو۔

پی ٹی آئی رہنما نے مزید کہا کہ یہ سوچتے ہیں کہ الیکشن کو یرغمال بنالیں گے، جلد ہی الیکشن کی تاریخ کا اعلان ہونے جارہا ہے، انشاءاللہ انکو چھپنے کی جگہ نہیں ملے گی۔