چیئرمین تحریک انصاف عمران خان نے کہا ہے کہ ہم حکمرانوں کو انتخابات سے بھاگنے نہیں دیں گے۔

تفصیلات کے مطابق چیئرمین تحریک انصاف عمران خان سے سابق وزیراعلیٰ پنجاب چودھری پرویزالٰہی کی ملاقات ہوئی جس میں سیاسی صورتحال اور آئندہ لائحہ عمل پر مشاورت کی گئی۔

ملاقات میں عمران خان اور چودھری پرویزالٰہی نے گورنرز کی جانب سے الیکشن کی تاریخ نہ دینے پر اظہار تشویش کیا۔

عمران خان نے کہا کہ آئین نگران سیٹ اپ، گورنرز اور الیکشن کمیشن کو 90 روز میں الیکشن کا پابند بناتا ہے۔

انہوں نے کہا کہ جو آئین شکنی کا مرتکب ہوگا آئین میں اس کے خلاف راستہ موجود ہے۔

یہ بھی پڑھیں؛ نوے روز میں الیکشن ہونا آئینی تقاضا ہے، عمران خان

چیئرمین تحریک انصاف عمران خان نے مزید کہا کہ حکمران انتخابات سے بھاگ رہے ہیں، ہم انشاء اللہ ان کو بھاگنے نہیں دیں گے۔

اس موقع پر وزیراعلیٰ پنجاب چودھری پرویزالٰہی نے کہا کہ وفاقی وزراء اور نگران سیٹ اپ کی شخصیات اعلانیہ آئین شکنی کے اشارے دے رہی ہیں جبکہ الیکشن میں تاخیر آئین شکنی ہوگی، آرٹیکل 6 کے تحت کاروائی ہوسکتی ہے۔

انہوں نے کہا کہ حکمرانوں کی نااہلی کی سزا عوام کو بھگتنا پڑ رہی ہے۔

یہ بھی پڑھیں؛ شہباز شریف نااہلی کے ورلڈ ریکارڈ قائم کررہے ہیں، پرویز الٰہی

ان کا کہنا تھا کہ حکمران نے اپنے کیسز میں تو ریلیف لے لیا، عوام کیلئے انکے پاس کوئی ریلیف نہیں ہے۔

چیئرمین تحریک انصاف عمران خان نے مزید کہا کہ ہر روز مہنگائی کا نیا بم عوام پر گرایاجارہا ہے، پٹرولیم مصنوعات کی قیمتوں میں اضافہ ظالمانہ ہے۔

ملاقات میں وائس چیئرمین پی ٹی آئی شاہ محمود قریشی، معروف قانون دان سلمان اکرم راجہ اور حافظ فرحت عباس بھی موجود تھے۔

یہ بھی پڑھیں؛ پی ٹی آئی کا ضمنی انتخابات میں حصہ لینے کا اعلان، عمران خان 33 نشستوں پر امیدوار ہوں گے