سابق وزیراعظم اور پاکستان تحریک انصاف کے چیئرمین عمران خان کی جانب سے وفاقی حکومت کے گرد گھیرا تنگ کرنے کا فیصلہ کیا گیا ہے۔

تفصیلات کے مطابق چیئرمین پی ٹی آئی عمران خان نے آج تحریک انصاف کی سینئر لیڈر شپ کا اجلاس زمان پارک میں طلب کرلیا ہے جس میں پارٹی کے مرکزی قائد ین اجلاس میں شریک ہوں گے۔

اس دوران وزیراعظم شہباز شریف کو اعتماد کے ووٹ کا کہنے کے حوالے سے پی ٹی آئی حکمت عملی کا جائزہ لے گی اور عمران خان کی حتمی منظوری کے بعد صدر مملکت شہباز شریف کو اعتماد کے ووٹ کے لئے کہیں گے۔

یہ بھی پڑھیں: صدر پاکستان وزیر اعظم کو اعتماد کا ووٹ لینے کا کہہ سکتے ہیں، ذرائع

اس کے علاوہ پی ٹی آئی کی مرکزی قیادت پنجاب اور کے پی کے لئے نگران سیٹ اپ کے حوالے سے بھی مشاورت کرے گی۔

خیال رہے کہ گورنر پنجاب آج کسی وقت بھی اسمبلی تحلیل کرنے کی ایڈوائس پر دستخط کردیں گے۔

وزیر اعلیٰ پنجاب نے جمعرات کی رات دس بج کر دس منٹ پر اسمبلی تحلیل کرنے کی سمری  گورنر کو بھجوائی تھی۔

وزیر اعلیٰ کی سمری کا 48 گھنٹے کاآئینی وقت آج رات دس بج کر دس منٹ پر ختم ہوجائے گا۔

اگر گورنر  پنجاب اسمبلی تحلیل کی ایڈوائس پر دستخط نہیں بھی کرتے تو رات دس بج کر گیارہ منٹ پر پنجاب اسمبلی آئینی طور پر تحلیل تصور ہوگی۔

پنجاب میں نگران حکومت کے قیام کے معاملے پر اسمبلی کی تحلیل کے بعد چوہدری پرویز الہیٰ آٹھ  روز تک نگراں وزیراعلیٰ کے فرائض سر انجام یں گے۔

ذرائع کا کہنا ہے کہ اسمبلی تحلیل کے بعد نگراں  وزیراعلیٰ 3 دن کے اندر اندر نامزد کرنا ہوگا۔3 نام قائد ایوان اور 3 نام قائد حزب اختلاف کی جانب سے  دیے جائیں گے۔

مزید پرھیں: اسمبلی کی تحلیل کے بعد پرویزالہیٰ کب تک نگران وزیراعلیٰ کے فرائض سرانجام دینگے؟