لاہور: اسپیکر پنجاب اسمبلی سبطین خان نے اسمبلیاں تحلیل نہ کرنے کی خبروں کی تردید کردی ہے۔

تفصیلات کے مطابق پنجاب اسمبلی کے اسپیکر سبطین خان نے اسمبلیاں تحلیل نہ کرنے کی خبروں کی تردید کرتے ہوئے کہا کہ عمران خان نے اسمبلیاں تحلیل نہ کرنے کی کوئی بات نہیں کی نہ ہی ہماری ایسی نیت ہے۔

سبطین خان نے کہا کہ عمران خان جب کہیں گے اسمبلیاں توڑ دیں گے، اسمبلیاں ضرور توڑیں گے جو آئینی قانونی پیچیدگیاں ہیں ان کو حل کرکے ہی توڑیں گے۔

اسپیکر پنجاب اسمبلی نے مزید کہا کہ ہمارے نمبرز پورے ہیں ہمارے ایم پی ایز کو کوئی چھپانا چاہے تب بھی نہیں چھپیں گے۔

تحریک انصاف کا جنوری کے پہلے ہفتے میں دونوں اسمبلیاں تحلیل کرنے کا دعوی

چند روز قبل تحریک انصاف کے رہنما رکن قومی اسمبلی (ایم این اے) ارباب شیر علی نے جنوری کے پہلے ہفتے میں پنجاب اور خیبرپختونخوا کی اسمبلیاں تحلیل کرنے کا دعویٰ کیا تھا۔

پی ٹی آئی کے رہنما ایم این اے ارباب شیر علی نے پشاور میں بول نیوز سے خصوصی گفتگو کرتے ہوئے کہا تھا کہ عمران خان کی ہدایت پر دونوں اسمبلیاں ضرور تحلیل ہو گی۔

انہوں نے کہا کہ ہم نے پنجاب اسمبلی تحلیل کرنے کی کوشش کی تھی، گورنر پنجاب نے غیر آئینی اقدام کر کے اسمبلی کو تحلیل سے روک دیا۔

یہ بھی پڑھیں؛ پی ٹی آئی کے ممبران نہیں چاہتے کہ اسمبلیاں تحلیل ہوں، عطا تارڑ

ارباب شیر علی نے کہا کہ دونوں اسمبلیاں ایک ساتھ تحلیل کرینگے، صرف خیبرپختونخوا اسمبلی تحلیل کرنے کا کوئی فائدہ نہیں، خیبر پختونخوا میں ہماری اکثریت ہے، خیبر پختونخوا میں حالات سازگار ہیں آسانی کے ساتھ اسمبلی تحلیل کر سکتے ہیں۔

پی ٹی آئی کے رہنما ایم این اے نے کہا کہ پنجاب اسمبلی کو تحلیل کرنے میں کچھ مشکلات درپیش ہیں، گورنر پنجاب نے آئین کی پامالی کی ہے، پنجاب کا مسئلہ عدالت میں گیا ہوا ہے، یہ مسئلہ اگلے مہینے کے پہلے ہفتے میں حل ہو جائے گا۔

ارباب شیر علی نے مزید کہا کہ جنوری کے پہلے ہفتے میں پنجاب اور خیبرپختونخوا اسمبلی تحلیل کر دینگے، قومی اسمبلی سے استعفوں کا مسئلہ بھی جلد حل ہو جائے گا۔