اسلام آباد: وفاقی حکومت کی جانب سے ہائر ایجوکیشن کمیشن (ایچ ای سی) کی خودمختاری ختم کرنے کا فیصلہ کیا گیا ہے۔

ذرائع کے مطابق حکومت نے ہائر ایجوکیشن کمیشن کے قیام کے آرڈیننس 2002میں ترامیم لانے کا فیصلہ کیا ہے۔

ذرائع نے بتایا کہ ایچ ای سی کو اعلیٰ اختیاراتی خود مختار فورم کے بجائے وفاقی وزارت تعلیم کے ماتحت کیا جائے گا۔

حکومت کی جانب سے کمیشن کے 18 رکنی خود مختار فورم میں صوبوں کی نمائندگی بھی ختم کرنے کا بھی فیصلہ کیا گیا ہے۔

ذرائع کا کہنا ہے کہ صوبوں کی نمائندگی ختم ہونے کے بعد اراکین کی تعداد 10 تک محدود ہو جائے گی۔ ایچ ای سی میں ایگزیکٹو ڈائریکٹر کی تعیناتی اراکین ہائر ایجوکیشن کمیشن کے بجائے وفاقی حکومت کرے گی۔

اس کے علاوہ مجوزہ ترامیم کے تحت چیرمین ایچ ای سی کی مدت ملازمت چار سال سے کم کر کے دو سال کرنے کا بھی فیصلہ کیا گیا۔

ذرائع نے مزید بتایا کہ وفاقی وزیر تعلیم  کارکردگی پر عدم اطمینان کی صورت میں چیرمین کو کسی بھی وقت سبکدوش کر سکیں گے۔