پرویزالہٰی نے کہا ہے کہ پنجاب کا سیاسی میدان بھی عمران خان کے نام ہوچکا ہے۔

تفصیلات کے مطابق سابق وزیراعلیٰ پنجاب چودھری پرویزالہٰی سے مسلم لیگ ق کے رہنما ساجد احمد خان بھٹی کی ملاقات ہوئی جس میں ملکی سیاسی صورتحا ل اور قانونی معاملات پر مشاورت کی گئی۔

اس موقع پر سابق وزیراعلیٰ پنجاب چودھری پرویزالہٰی نے کہا کہ عمران خان کے خوف نے حکمرانوں کی نیندیں حرام کردی ہیں، ن لیگ میں سیاسی میدان میں عمران خان کا مقابلہ کرنے کی ہمت نہیں۔

چودھری پرویزالہٰی نے کہا کہ پنجاب کا سیاسی میدان بھی عمران خان کے نام ہوچکا ہے، مسلم لیگ ن پنجاب کھو چکی ، اب ن لیگ کا کوئی مستقبل نہیں۔

انہوں نے یہ بھی کہا کہ شہباز شریف تاریخ کے نا اہل ترین حکمران ثابت ہورہے ہیں، شہباز شریف کی نااہلیوں کا بوجھ اٹھانے کیلئے مریم نواز بھی تیار نہیں۔

چودھری پرویزالہٰی کا کہنا تھا کہ مریم نواز کی لندن سے واپسی پر ایک مرتبہ پھر لانچنگ بھی ناکام ہوگئی ہے، پی ڈی ایم کو تمام تر کوشش ہے کہ اقتدار سے چمٹے رہیں جس کیلئے انہیں آئین شکنی بھی قبول ہے۔

ان کا یہ بھی کہنا تھا کہ جیل بھرو تحریک میں گرفتاریاں پیش کرنے کیلئے کارکنوں کو جوش و جذبہ دیدنی ہے، اوورسیز پاکستانی بھی گرفتاری کیلئے اپنا نام رضاکارانہ پیش کر رہے ہیں۔

سابق وزیراعلیٰ پنجاب چودھری پرویزالہٰی کا مزید کہنا تھا کہ اس وقت پاکستان کی سیاست کا ایک ہی سٹار ہے اور اس کا نام عمران خان ہے، حکمرانوں کے انتقامی اقدامات کا ڈٹ کر مقابلہ کریں گے۔