پارٹی چیئرمین شپ سے ہٹانے کے کیس میں آئندہ سماعت سے قبل عمران خان سے جواب طلب کرلیا گیا ہے۔

تفصیلات کے مطابق الیکشن کمیشن میں عمران خان کو پارٹی چیئرمین سے ہٹانے کے کیس میں ممبر سندھ درانی کی زیر صدارت تین رکنی کمیشن کی سماعت ہوئی۔

دوران سماعت عمران خان کی جانب سے بیرسٹر گوہر الیکشن کمیشن میں پیش ہوئے  بتایا کہ یہ معاملہ عدالت میں زیر سماعت ہے، جب تک معاملہ عدالت میں زیر سماعت ہے الیکشن کمیشن اس کاروائی کو موخر کرے۔

اس موقع پر ممبر سندھ نثار درانی نے کہا کہہائی کورٹ نے الیکشن کمیشن کو اس کیس پر کارروائی سے نہیں روکا ہے جس کے بعد الیکشن کمیشن نے عمران خان کے وکیل کی کیس پر کارروائی مؤخر کرنے کی درخواست مسترد کردی۔

یہ بھی پڑھیں: عمران خان کو پارٹی چیئرمین شپ سے ہٹانے کی درخواست پر فیصلہ محفوظ

اس موقع پر بیرسٹر گوہر کا کہنا تھا اس کیس میں درخواست گزار آج تک الیکشن کمیشن میں پیش نہیں ہوئے، درخواست گزار کی عدم پیشی کے باعث الیکشن کمیشن یہ درخواست خارج کرے۔

بعدازاں الیکشن کمیشن نے آئندہ سماعت سے قبل پارٹی چیئرمین شپ سے ہٹانے کے کیس میں عمران خان سے جواب طلب کرلیا اور کیس کی مزید سماعت 7 مارچ تک ملتوی کردی گئی۔

سماعت کی تفصیلات کے مطابق ممبر کے پی اکرام اللہ کا کہنا تھا کہ عدالت کا حکم امتناع تو نااہلی کے ڈیکلریشن دینے کی حد تک لگ رہا ہے جس پر عمران خان کے وکیل کا کہنا تھا کہ لاہور ہائیکورٹ نے معاملہ فل بنچ کو بھجوا دیا ہے۔

ممبر کے پی اکرام اللہ کا کہنا تھا کہ لاہور ہائیکورٹ میں جو درخواست دائر کی تھی اسکی کاپی فراہم کریں، درخواست آتی ہے تو آپ لوگ ہائیکورٹ پہنچ جاتے ہیں، اسٹے آرڈر کے بعد ہمارا کام صرف آنا بیٹھنا اور جانا رہ گیا ہے۔

عمران خان کے وکیل کا کہنا تھا کہ موجودہ کیس میں الیکشن کمیشن نے سوموٹو لیا ہے جس پر ممبر کے پی اکرام اللہ کا کہنا تھا کہ الیکشن کمیشن سوموٹو لیتا ہے نہ ایسا کوئی اختیار ہے تاہم درخواست گزار کو بھی نوٹس کر رہے ہیں وہ دلچسپی رکھتا ہے یا نہیں۔