وفاقی وزیر داخلہ رانا ثناء اللہ نے کہا ہے کہ قوم ووٹ کی طاقت سے عمران خان کو مائنس کرے گی۔

رانا ثناء اللہ نے فیصل آباد میں پریس کانفرنس کرتے ہوئے کہا کہ جب بھی الیکشن ہونگے قوم ووٹ کی طاقت سے عمران خان کومائنس کرے گی، قوم ووٹ کی طاقت سے فتنے کا خاتمہ کرے گی۔

عمران خان ملک میں سیاسی عدم استحکام چاہتے ہیں

انہوں نے کہا کہ عمران خان نے 4سال مسائل پیدا کرنے کےعلاوہ کچھ نہیں کیا، انہوں نے ملک کی بہتری کے لئے ایک بھی دن کام نہیں کیا، ہر دن یہ ملک کو افراتفری کی طرف لے کر جاتے ہیں، کبھی کہتے ہیں اسلام آباد آرہا ہوں، ملک دشمن حرکت میں جب ناکام ہوتے ہیں تو ایک نیا فارمولا لے کر آجاتے ہیں، ان کے تمام فارمولے فیل ہوئے ہیں۔

وفاقی وزیر نے کہا کہ یہ چاہتے ہیں سیاسی عدم استحکام رہے، ان کو معلوم ہے عدم استحکام کا مقصد کیا ہے، یہ آدمی بنیادی طور پر مسائل پیدا کرتا ہے، ہماری کوشش ہے عدم استحکام سے نکالیں۔

ہم عدلیہ کو کمزور نہیں کرنا چاہتے

رانا ثناء اللہ نے کہا کہ ہمارے نزدیک عدلیہ کا احترام ہے، ہم عدلیہ کو کمزور نہیں کرنا چاہتے، معاملہ پرویز الہیٰ کی آڈیو کا ہے، ان کی آڈیو کے فرانزک تک یہ شک کے زمرے میں آئے گی، ان کی آڈیو پر ازخود نوٹس لیا جائے۔

انکا کہنا ہے کہ عمران خان فائرنگ کیس میں ملزم موجود ہے، یہ اس ملزم کی آج تک تردید نہیں لاسکے، یہ ہمیں ملزم ٹھہرا رہے ہیں، وہ بندہ مذہبی ہے۔

پارٹی کے ٹکٹ کیلئے پارلیمانی بورڈ فیصلہ کرے گا

وزیر داخلہ نے کہا کہ  جیل بھرو تحریک انصاف پی ٹی آئی کے لیے اور عمران خان کے لیے ڈوب مرو تحریک بن چکی ہے، جیل بھرو تحریک والوں کو 30 دن کے لیے نظر بند کیا ہے۔

رانا ثناء اللہ نے کہا کہ پارٹی کے ٹکٹ کے لیے پارلیمانی بورڈ فیصلہ کرے گا، ہماری پارٹی الیکشن امیدواروں کا سروے کروا رہی ہے۔

انہوں نے مزید کہا کہ مسلم لیگ ن آج بھی مضبوط ہے، کچھ حلقوں میں مسائل ہیں وہاں پارٹی نظر ثانی کرے گی، جب تک مجھے تھریٹ ہے تب تک بلٹ پروف گاڑی رکھنا مجبوری ہے، مجھ سمیت ہماری پارٹی کے کچھ لوگوں کو سیکیورٹی تھریٹ ہے جس کی وجہ سے بلٹ پروف گاڑی پر سفر کرتا ہوں، مجھے بڑی گاڑی یا بلٹ پروف گاڑی کا شوق نہیں مجبوری ہے۔