گورنر پنجاب محمد بلیغ الرحمن نے کہا ہے کہ وزیر اعظم شہباز شریف کی سربراہی میں اتحادی حکومت ملک کے مسائل حل کرنے کی بھرپور کوشش کر رہی ہے۔

تفصیلات کے مطابق گورنر پنجاب محمد بلیغ الرحمن سے سینیٹر حافظ عبدلکریم نے اپنے وفد کے ہمراہ ملاقات کی جس میں ملک کی سیاسی اور معاشی صورتحال پر تبادلہ خیال ہوا۔

گورنر پنجاب نے اس موقع پر کہا کہ اس وقت حکومت کو بہت سے معاشی چیلنجز اور مسائل کا سامنا ہے، ملک کے سیاسی اور معاشی حالات اور دہشت گردی کے تناظر میں تمام سیاسی پارٹیوں کو مل کر صرف ملک میں استحکام لانے کے لیے کام کرنا ہے۔

بلیغ الرحمن نے کہا کہ اتحادی حکومت  ملک کے میں معاشی استحکام لانے کے لیے کوشاں ہے، اتحادی حکومت وزیر اعظم پاکستان محمد شہباز شریف کی سربراہی میں ملک کے مسائل حل کرنے کی بھرپور کوششیں کر رہی ہے، ملک میں آئین اور قانون کی بالادستی ترجیح ہے۔

سینیٹر حافظ عبدلکریم نے کہا کہ پاکستان تحریک انصاف کے آئینی عہدوں پر بیٹھے گورنر، سپیکر اور ڈپٹی اسپیکر کے خلاف آئین اقدامات کی روایات کے برعکس موجودہ گورنر نے آئینی عہدے کی توقیر برقرار رکھی۔

ان کا یہ بھی کہنا تھا کہ ملک کے معاشی حالات اور دیگر مسائل کے حل کے لیے تمام سیاسی جماعتوں کو آپس میں اتفاق رائے پیدا کرنا ہو گا۔