بینکنگ کورٹ نے  ہائیکورٹ احکامات کی روشنی میں فارن فنڈنگ کیس میں عمران خان کی ضمانت پر فیصلہ موخر کردیا۔

تفصیلات کے مطابق بینکنگ کورٹ میں فارن ایکسچینج ایکٹ کے مقدمے میں چیئرمین پی ٹی آئی عمران خان کی حاضری سے استثنیٰ کی درخواست پر سماعت ہوئی۔

عمران خان اور شریک ملزمان کے وکلا کے دلائل مکمل ہونے کے بعد اسپیشل پراسیکیوٹر ایف آئی اے رضوان عباسی نے استدعا کی عمران خان تعاون نہیں کررہے،ان کی درخواست ضمانت مسترد کی جائے۔

یہ بھی پڑھیں: فارن ایکسچینج ایکٹ کا مقدمہ بنکنگ کورٹ کو بھیجنے کا تفصیلی فیصلہ جاری

رضوان عباسی نے اپنے دلائل میں کہا کہ  ملزمان کے وکلا نے دلائل میں جرم کا اعتراف کیا ہے۔ یہاں کہا گیا  کہ مسجد میں کوئی چندہ دے جائے تو  کوئی نہیں پوچھتا،  ایسا چندہ پاکستان میں ہی ہوتا ہے یو اے ای میں نہیں۔

انہوں نے مزید کہا کہ ٹرانزیکشن مان کر قبول کیا گیا کہ سیکشن 5سی کے تحت جرم کیا ہے۔

اسپیشل پراسیکیوٹر نے کہا کہ  پراسیکیوشن کی طرف سے کوئی بدنیتی شامل نہیں ہے۔

جج رخشندہ شاہین نے استفسار کیا کہ  عمران خان کا کوئی وکیل اس وقت عدالت میں ہے؟ ہائیکورٹ نے ابھی اس عدالت  کے لیے کوئی ڈائریکشن تو نہیں دی؟ جس پر معاون وکیل سلمان صفدر نے عدالت کو بتایا کہ ابھی ہائیکورٹ سے ایسا کوئی حکم سامنے نہیں آیا۔

یہ بھی پڑھیں: پارٹی چیئرمین شپ سے ہٹانے کا کیس، آئندہ سماعت سے قبل عمران خان سے جواب طلب

اسپیشل پراسیکیوٹر نے کہا کہ  ہائیکورٹ میں تو ان کی درخواست پر اعتراض لگا ہے۔عمران خان کبھی کسی سرکاری اسپتال میں کیوں نہیں گئے ؟  عمران خان کو کوئی ایسا سیریس مسئلہ نہیں ہے ،ٹانگ میں معمولی کھنچاؤ اور سوزش ہے۔

رضوان عباسی نے کہا کہ عمران خان کی پرائیویٹ میڈیکل رپورٹ استثنیٰ کے لیے کافی نہیں ہے اور عمر رسیدہ ہونے کا موقف بھی قانون کے لیے اجنبی ہے۔

فریقین کے دلائل سننے کے بعد جج  رخشندہ شاہین نے عمران خان کی حاضری سے استثنیٰ کی درخواست مسترد کرتے ہوئے  ساڑھے 3 بجے عدالت میں پیش ہونے کا حکم تھا۔

جج رخشندہ شاہین نے اپنے فیصلے میں کہا تھا کہ عمران خان ساڑھے 3 بجے تک پیش نہ ہوئے تو ضمانت خارج کردی جائے گی۔

بعد ازاں ہائیکورٹ کے احکامات کی روشنی میں عمران خان کی ضمانت پر فیصلہ موخر کرتےہوئے جج رخشندہ شاہین نے کہا کہ میں نے کنفرم کرلیا ہے ہائیکورٹ نے ہمیں روکا ہے۔

جج رخشندہ شاہین نے 18  فروری کو ہائیکورٹ کے حکم کی مصدقہ نقل جمع کرانے کا حکم دیتے ہوئے سماعت ملتوی کردی۔