سابق وفاقی وزیر شیخ رشید نے کہا ہے کہ سابق وزیراعظم عمران خان کے پاس اطلاعات ہیں کہ انہیں قتل کردیا جائیگا۔

بول نیوز سے گفتگو کرتے ہوئے عوامی مسلم لیگ کے سربراہ نے کہا ہے کہ بے نظیر بھٹو کی شہادت کے وقت سے زیادہ خطرناک حالات دیکھ رہا ہوں اور ملکی سلامتی کیلئے انتخابات کرانا ضروری ہے۔

انہوں نے کہا ہے کہ ہر ادارہ اپنا کام کرے، وقت پر الیکشن کرائے جائیں اور خانہ جنگی، جوڈو کراٹے چاہتے ہیں تو انتخابات نہ کرائیں۔

انہوں نے مزید کہا کہ عمران خان کو آج گرفتارکریں گے کل ضمانت ہو جائیگی اور جیل جانے سے کچھ نہیں ہوتا، میں بھی 16 دن گزار کر آیا لیکن  ان کے پاس اطلاعات ہیں کہ انہیں قتل کردیا جائے گا۔

شیخ رشید کا کہنا تھا کہ عمران خان کے نزدیک 15 جون تک معاملات اہم ہیں، توشہ خانہ کے بعد فارن فنڈنگ کیس بھی زمین بوس ہوجائے گا۔

یہ بھی پڑھیں: حکمرانوں کو ریاست کی نہیں اپنی سیاست کی فکر ہے، شیخ رشید

اس سے قبل اپنے ایک پیغام میں انہوں نے کہا ہے کہ پی ڈی ایم ٹوٹ چکی ہے، اُسکی 4 بڑی پارٹیاں ن لیگ، پی پی پی، اے این پی اور جمعیت اہلحدیث اپنے الگ نشان پر الیکشن لڑرہی ہیں۔

انہوں نے مزید کہا کہ جو آئین کی حکم عدولی کرے گا وہ آرٹیکل 6 کی زدمیں آئے گا اور آئین کی حکمرانی نہیں ہوئی توخانہ جنگی ہوگی۔

شیخ رشید کا کہنا تھا کہ  لاہور کی ریلی نے حق ادا کردیا ہے اور اب مینار پاکستان میں عدلیہ سے یکجہتی کا اظہار ہوگا لیکن عمران خان پر ہاتھ ڈالنے والے اُس کے نتیجے سے بھی باخبر رہیں۔

ان کا کہنا تھا کہ آئی ایم ایف کے معاہدے میں بھی تاخیر ہوگئی ہے اور 7 ارب ڈالر کی بیرونی فنانسنگ کی توثیق مسئلہ ہے تاہم امریکہ سے خیرات کن شرائط پر ملیں گی اس حوالے سے قوم کو اعتماد میں لینا ہوگا۔