کراچی میں سال 2023 کی پہلی بارش کا آغاز ہوگیا ہے، شہر کے شمالی علاقوں میں بادل بننے کا سلسلہ شروع ہو گیا۔

کراچی کے مختلف علاقوں میں ہلکی بارش شروع ہوگئی ہے، سرجانی، نارتھ کراچی، نیا ناظم آباد، گلشن معمار، گلشن حدید، پورٹ قاسم سمیت ملحقہ علاقوں میں ہلکی بارش اور بوندا باندی کا سلسلہ شروع ہو گیا ہے۔

شہر کے شمالی علاقوں میں تیز بارش کا سلسلہ شروع ہوگیا جبکہ سرجانی، گردونواح، ماڈل کالونی، ملیر، کورنگی اور اطراف کے علاقوں میں ژالہ باری جاری ہے۔

خیال رہے کہ بادل بننے کا سلسلہ شہر بھر میں وسیع ہوگا، شام تک شہر کے دیگر علاقوں میں بھی بارش کا امکان ہے تاہم بارش کا سلسلہ 19 مارچ تک جاری رہے گا۔

محکمہ موسمیات کے مطابق اندورن سندھ میں کل سے بارش کا سلسلہ جاری ہے تاہم آج کم سے کم درجہ حرارت 24.5 ڈگری سینٹی گریڈ ریکارڈ ہونے کا امکان ہے ۔

 شہر میں ہوا میں نمی کا تناسب 84 فیصد ریکارڈ کیا گیا جبکہ اس وقت شمال جنوبی سمت سے 8 کلومیٹر فی گھنٹہ کی رفتار سے ہوا چل رہی ہے ۔

اس کے علاوہ فیصل آباد اور گردونواح میں بھی بوندا باندی کا سلسلہ جاری ہے جس کے بعد موسم خوشگوار ہو گیا ہے۔ محکمہ موسمیات کا کہنا ہے کہ آئندہ 24 گھنٹوں میں مزید بارش کا امکان ہے۔

محکمہ موسمیات نے ملک میں بارشوں کی پیشگوئی کرتے ہوئے کہا تھا کہ 17 تا 19 مارچ سندھ بھر سمیت کراچی میں بارش کا امکان ہے اور اس دوران گرد آلود ہوائیں یا آندھی بھی چلے گی ۔

محکمہ موسمیات نے بتایا تھا کہ 17 تا 19 مارچ گرج چمک کے ساتھ تیز بارش کا امکان ہے تاہم شہر میں بارش کے دوران درجہ حرارت چند ڈگری گر سکتا ہے ۔

واضح رہے کہ ملک میں بارشوں کی پیشگوئی کے پیش نظر محکمہ موسمیات نے تمام متعلقہ اداروں کو الرٹ رہنے کی ہدایت کر رکھی ہے ۔

یہ بھی پڑھیں: کراچی سمیت ملک بھر میں گرج چمک کے ساتھ بارش کا امکان