سابق وفاقی وزیر داخلہ و پی ٹی آئی کے سینئر رہنما شیخ رشید نے کہا ہے کہ میں آخری دم تک عمران خان کے ساتھ چٹان کی طرح کھڑا ہوں۔

تفصیلات کے مطابق شیخ رشید نے اسلام آباد کچہری میں میڈیا سے گفتگو کرتے ہوئے کہا کہ میرے 2 فون نامعلوم افراد رات کو میرے گھر پر چھوڑ گئے، 3 فون ابھی تک ان کے پاس ہیں۔

شیخ رشید نے کہا کہ یہ کریک ڈاؤن کرنے جا رہے ہیں، عمران خان کی سیاست اور پارٹی کو ختم کرنا چاہتے ہیں لیکن ناکام ہوں گے، جو بھی رائے عامہ کا احترام نہیں کرتا نقصان اٹھاتا ہے، میں سب سے کہوں گا کہ عقل سے کام لیں، ملک کی معاشی اور اقتصادی کشتی ڈوب رہی ہے۔

ان کا کہنا تھا کہ اس وقت لوگ صرف شفاف انتخابات چاہتے ہیں، یہ تحریک انصاف کے خلاف کریک ڈاؤن کرنے جارہے ہیں، ممکن ہے کہ یہ تحریک انصاف پر پابندی لگانے کی خواہش رکھتے ہوں، عمران خان کی گرفتاری تو کوئی مسئلہ نہیں لیکن یہ اس کو مارنا چاہتے ہیں۔

انہوں نے کہا کہ ان کے پاس نہ امیدوار ہیں نا پولنگ ایجنٹ ہیں نا الیکشن کی تیاری ہے صرف فراری ہے، انتخابات کے لیے صرف عمران خان تیار ہیں، میں آخری دم تک عمران خان کے ساتھ چٹان کی طرح کھڑا ہوں۔

ضرور پڑھیں؛ بول نیوز کے بیورو چیف اسلام آباد صدیق جان اغوا