لاہور: زمان پارک میں ہنگامہ آرائی کے پیش نظر پاکستان تحریک انصاف (پی ٹی آئی) کے چیئرمین عمران خان اور دیگر پارٹی قائدین پر مقدمہ درج کرلیا گیا ہے۔

تفصیلات کے مطابق چیئرمین عمران خان اور دیگر پارٹی قائدین پر مقدمہ نمبر 410/23 تھانہ ریس کورس میں ایس ایچ او ریس کورس ریحان انور کی مدعیت میں درج ہوا۔

لاہورزمان پارک میں ہنگامہ آرائی چیرمین پی ٹی آئی عمران خان اور دیگر پارٹی قائدین پر مقدمہ درج تفصیلات کے مطابق مقدمہ نمبر 410/23 تھانہ ریس کورس میں درج ہوا مقدمہ ایس ایچ او ریس کورس کی مدعیت میں درج کیا گیا مقدمہ میں دہشت گردی سمیت 20 دفعات شامل کی گئی ہیں۔#BOLNews #ImranKhan pic.twitter.com/td2OXaErZY

— BOL Network (@BOLNETWORK) March 16, 2023

ایف آئی آر میں بتایا گیا ہے کہ سابق وزیراعظم عمران خان اور دیگر پارٹی قائدین کیخلاف مقدمے میں دہشت گردی سمیت 20 دفعات شامل کی گئی ہیں۔

ایف آئی آر کے مطابق تحریک انصاف کے قائدین اور سینکڑوں کارکنان نے عمران خان کی ایما پر سنگین جرائم کیے۔ عمران خان اور ساتھیوں پر مجرمانہ سازش کی دفعہ بھی لگ گئی۔

اس کے علاوہ مقدمے میں بلوہ، سمن وصولی سے انکار سمیت دیگر دفعات شامل ہیں تاہم کار سرکار میں مداخلت کی دفعہ بھی شامل ہے۔

ایف آئی آر کے مطابق پی ٹی آئی کارکنان عوام کے لئے مشکلات اور پریشانی پیدا کرنے کے موجب بنے۔ کارکنوں نے سرکاری املاک کو نقصان پہنچایا۔

ایف آئی آر میں مزید بتایا گیا  کہ پی ٹی آئی کارکنوں کے حملوں میں ڈی آئی جی اسلام آباد سمیت متعدد پولیس اہلکار زخمی ہوئے۔

زمان پارک میں ہنگامہ آرائی

واضح رہے کہ گزشتہ روز مان پارک سے چیئرمین پی ٹی آئی عمران خان کو گرفتار کیے جانے کے خدشے کے پیش نظر پولیس اور پی ٹی آئی کے کارکنان میں تصادم ہوا تھا۔

پولیس اور تحریک انصاف کے کارکنوں کے درمیان پتھراؤ اور شیلنگ کا سلسلہ وقفے وقفے سے جاری  رہا جبکہ پولیس کی جانب سے شیلنگ اور پتھراؤ کے باعث زمان پارک میں مقیم رہاشیوں کی املاک کو نقصان پہنچا۔

اس کے علاوہ آنسو گیس کی شیلنگ اور پتھراؤ کے باعث کئی گھروں کی کھڑکیوں کے شیشے ٹوٹ گئے  جبکہ آنسو گیس کی شیلنگ کے باعث زمان پارک کے رہائشیوں کو شدید مشکلات کا سامنا رہا۔

یہ بھی پڑھیں: پی ٹی آئی رہنماؤں اور کارکنوں کیخلاف کئی شہروں میں مقدمات درج

پولیس کی جانب سے آنسو گیس کے شیل لگنے سے کئی افراد زخمی ہوئے جبکہ شیر خوار بچے بھی آنسو گیس سے شدید متاثر ہوئے۔

علاوہ ازیں مسلح پولیس نے تحریک انصاف کے کارکنوں پر سیدھے فائر اور شیلنگ کی جس کے بعد ایک بار پھر زمان پارک کو میدان جنگ میں تبدیل کر دیا۔

پی ٹی آئی کارکنان اور پولیس کے درمیان تصادم کے نتیجے میں 51 پولیس اہلکار زخمی ہوئے جبکہ 8 شہری بھی زخمی حالت میں اسپتال منتقل ہوئے۔