پاکستان مسلم لیگ ن کے سینئر رہنما اور سابق وزیراعلیٰ پنجاب حمزہ شہباز آج رات وطن واپس پہنچیں گے۔

پارٹی ذرائع کے مطابق پاکستان مسلم لیگ ن کے سینئر رہنما اور سابق وزیراعلیٰ پنجاب حمزہ شہباز غیر ملکی ایئرلائن کی پرواز کے ذریعے لاہور کے علامہ اقبال انٹرنیشنل ایئرپورٹ پر آج رات 3 سے 4 بجے وطن واپس پہنچیں گے۔

حمزہ شہباز کو سخت سکیورٹی میں سرکاری پروٹوکول کے ساتھ ان کی رہائشگاہ ماڈل ٹاون پہنچایا جائے گا۔

واضح رہے کہ حمزہ شہباز سعودی عرب میں عمرہ کی ادائیگی کے بعد وطن واپس پہنچ رہے ہیں۔

حمزہ شہباز 3 ماہ پہلے 14 دسمبر کو نجی دورے پر بیرون ملک روانہ ہوئے تھے اور وہاں انہوں نے لندن اور امریکہ میں اپنی فیملی کے ساتھ وقت گزارا۔

یہ بھی پڑھیں؛ حمزہ شہباز کا وطن واپسی کا فیصلہ

حمزہ شہباز وطن واپس پہنچتے ہی پنجاب اسمبلی کے انتخابات کے حوالے سے سیاسی سرگرمیوں میں حصہ لیں گے اور مریم نواز کے ساتھ مل کر پنجاب اسمبلی کے انتخابات کے حوالے سے انتخابی مہم چلائیں گے۔

حمزہ شہباز پنجاب اسمبلی کے امیدواروں کے چناؤ کے حوالے سے بنائے گئے پارلیمانی بورڈ کے اجلاسوں میں بھی شریک ہوں گے۔

نواز شریف پنجاب اسمبلی کے انتخابات کے حوالے سے امیدواروں کے چناؤ میں حمزہ شہباز کی رائے کو اہمیت دیں گے۔