وفاقی حکومت نے اپنی مدت مکمل ہونے سے 18 روز قبل الیکشن اصلاحات کا بہت بڑا پیکیج آج پارلیمنٹ کے مشترکہ اجلاس سے منظور کرانے کا فیصلہ کرلیا۔

تفصیلات کے مطابق الیکشن ایکٹ 2017میں 44 الیکشن ترامیم لانے کی تیاری کرلی  گئی ہے تاہم حکومتی مدت کے بارہ ورکنگ ایام کو مدنظر رکھتے ہوئے جلد بازی میں قانون سازی کا فیصلہ کیا گیا ہے۔

حکومت باریک واردات کرنے کو تیار

حکومت باریک واردات کرتے ہوئے اتنی بڑی قانون سازی کا پہلے سے موجود بل میں ترامیم کے ذریعے کرنے کا پلان ہے۔

ذرائع پارلیمانی امور کے مطابق انتخابی اصلاحات کا 44ترامیم پر مشتمل پیکیج الگ سے مکمل بل ہونا چاہیے، اتنا بڑا انتخابی اصلاحات کا پیکیج ترامیم کی صورت میں لانے سے حکومت کی بدنیتی ظاہر ہوتی ہے۔

اس حوالے سے وفاقی وزیر پارلیمانی امور مرتضیٰ جاوید عباسی نے انتخابی اصلاحاتی پیکیج آج مشترکہ اجلاس میں پیش کرنے کی تصدیق کردی۔

انہوں نے کہا کہ حکومت اگر بارہ اور تیرہ اگست کی درمیانی رات اسمبلی تحلیل ہوتی ہے تو حکومت کے پاس کل اٹھارہ روز بچتے ہیں، حکومت کے آخری اٹھارہ روز میں یوم عاشور اور دیگر چھٹیاں ملاکر بارہ ورکنگ ایام بچتے ہیں۔

مرتضیٰ جاوید عباسی نے کہا کہ حکومت نے آج انتخابی اصلاحات کا بل منظور کرالیا تو دس روز آٹھ اگست تک صدر کو دستخط کرنا ہوں گے، مشترکہ اجلاس کی قانون سازی پر دس روز کے اندر صدر دستخط نہیں کرتے تو ازخود قانون بن جائے گا۔

انکا کہنا ہے کہ صدر مملکت کو مشترکہ اجلاس کی قانون سازی کے بعد بل کو واپس بھیجنے کا کوئی اختیار نہیں۔ عام قانون سازی جو سینیٹ اور اسمبلی سے منظور ہوکر صدر کے پاس جاتی ہے اس کو پندرہ روز میں صدر مملکت مشترکہ اجلاس کو مزید غور کے لئے بھیج سکتے ہیں۔

وفاقی وزیر نے مزید کہا کہ مشترکہ اجلاس اگر وہی قانون سازی دوبارہ کردیتا ہے تو پھر صدر دس روز تک دستخط نہ بھی کریں تو وہ قانون بن جاتا ہے، مشترکہ اجلاس کوئی قانون سازی کردے تو پھر صدر کے پاس ایک ہی بار دستخطوں کے لئے دس روز ہوتے ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.bolnews.com/urdu/pakistan/2023/07/143324/amp/ کو لائک کریں

ٹوئٹر پر ہمیں فالو کریں https://www.bolnews.com/urdu/pakistan/2023/07/143324/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں