نگراں وزیر خارجہ جلیل عباس جیلانی کا غزہ کی صورت حال پر ترکیہ کے وزیر خارجہ ہاکان فیدان سے ٹیلیفونک رابطہ ہوا ہے۔

تفصیلات کے مطابق سماجی رابطے کی ایب سائٹ ایکس (ٹوئٹر) پر نگراں وزیر خارجہ جلیل عباس جیلانی نے اپنے ایک پیغام میں کہا کہ ترکیہ کے وزیر خارجہ ہاکان فیدان سے گفتگو میں ہم نے مسئلہ فلسطین کے مستقل حل کی ضرورت پر اتفاق کیا اور اسرائیل سے جنگ بندی کا فوری مطالبہ کیا۔

جلیل عباس جیلانی نے کہا کہ گفتگو میں ریلیف کوریڈور،اسرائیلی بستیوں کا خاتمہ اور قیدیوں کی رہائی کا مطالبہ بھی دہرایا۔

پاک ترکیہ وزراء خارجہ نے مزید کہا کہ اقوام متحدہ کی قراردادوں پر مبنی مسئلے کا حل نکالا جائے۔

جلیل عباس جیلانی کا غزہ کی صورت حال پر ایران اور مصر کے وزرائے خارجہ سے رابطہ

نگران وفاقی وزیر خارجہ جلیل عباس جیلانی نے غزہ کی صورت حال پر ایران اور مصر کے وزرائے خارجہ سے رابطہ کیا ہے۔

سماجی رابطے کی ویب سائٹ ’ایکس‘ پر اپنے ایک بیان میں جلیل عباس جیلانی نے کہا کہ غزہ میں بڑے پیمانے پر شہادتوں اور فلسطینیوں کی اپنے گھروں سے بے دخلی کے معاملے پر ایرانی وزیرخارجہ حسین عامر عبداللہیان سے بات کی ہے۔

جلیل عباس جیلانی نے کہاکہ دونوں ملکوں نے جنگ کو فوری طور پر روکنے اور فلسطینی عوام کو فوری امداد پہنچانے پر اتفاق کیا ہے۔

اپنی ایک اور ٹوئٹ میں جلیل عباس جیلانی نے کہا کہ مصری ہم منصب سے بھی اس حوالے سے بات چیت کی ہے۔

جلیل عباس جیلانی کے مطابق مصری وزیر خارجہ سے گفتگو میں اس بات پر اتفاق کیا گیا ہے کہ جنگ کو بڑھنے سے روکنے، سویلین کو اجتماعی سزا، فاقہ کشی اور بے گھر ہونے سے بچانے کی ضرورت ہے۔

جلیل عباس جیلانی نے مصری وزیر خارجہ کو فلسطینیوں کی انسانی بنیادوں پر امداد کے لیے ہر ممکن تعاون کی یقین دہانی کروائی۔

واضح رہے کہ اسرائیل اور فلسطین کی مزاحمتی تحریک ’حماس‘ کے درمیان جاری کشیدگی کے بعد اسرائیل کی جانب سے غزہ پر مسلسل بمباری کی جا رہی ہے اور اب تک 2500 سے زیاددہ فلسطینی شہید ہو چکے ہیں۔

اسرائیل کی جانب سے نقل مکانے کرنے والے فلسطینیوں کو بھی نشانہ بنایا جا رہا ہے۔

اسرائیل نے فلسطین کے عوام کو غزہ خالی کرنے کی دھمکی دی ہے مگر حماس نے جواباً کہا ہے کہ اگر زمینی حملہ کرنے کی کوشش کی گئی تو اسرائیلی فوج کو نیست و نابود کر دیں گے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/10/242208/amp/ کو لائک کریں

ٹوئٹر پر ہمیں فالو کریں https://www.bolnews.com/urdu/pakistan/2023/10/242208/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں